4855/2025-2026  

Saitual, 17th March (Thawhlehni) : World Consumer Rights Day 2026 chu ram chhung hmun dangte rualin Saitualah pawh vawiin khan hman a ni a, PCI Saitual Chhimveng Kohhran Hall-a hun hmannaah hian Pu Lallawmawma Addl DC Saitual chu Khuallian niin thu a sawi.

Khuallian chuan World Consumer Rights Day hman a ni chu lawmawm a tih thu a sawi a, van boruak leh lei hnuai hausakna thlengin tunlai khawvelah kan inchuh tawh a, a huai huai leh thil ti theite dinchanna hmunah kan chhuah tawh a ni, a ti.

Pu Lallawmawma chuan mitinin dikna leh thar chhuah him leh țha, consumer te tana innghahna tlak kan neih theih nan consumer te kan intel khawm a ngai a, thar chhuah leh siam chhuah a man bithliah aia tama lei leh zawrh chungchangah pawh tun aia nasa zawka kan țan rual a țul tawh hle a ni, a ti.

Pu R. Lalruatkima, President Saitual District Consumer Union chuan "Safe Product, Confident Consumers" (Thil siam chhuah him, Consumer te inrintawkna) tih thupui hmangin kal khawmte zirtirna a pe a, danin Consumer te tana hriat tur pawimawh a tarlante, Consumer Right lo pian chhuah dan te a sawi zau bawk a ni.

Kalkhawmte atangin zawhna leh chhanna hun hman niin, hlawkthlak taka hun hman zui a ni.

Vawiin Consumer Rights Day hmanna hi Pu HC Lalthawmmawia Inspector FCS & CA Dept Saitual chuan kaihruaiin Saitual town huam chhunga khawtlang hruaitu te leh Consumer pawl hrang hrang aiawhte an tel a ni.