2204/2026-2027

Lawngtlai, the 14th, September, 2026 : Vawiin chhun dar 12:00 PM khan kar hmasa Zirtawpni (September 11) tlai a Tuihawk in a lak vanga thi, Lawngtlai College Venga, Pu B.Lalbawiliana Fanu, Ruby Lalrinsiami, Kum 6 chu vawiin khan Lawngtlai Bawrhsap Pu Donny Lalruatsanga chuan râlna a nei a. Ruby Lalrinsiami Nu leh Pa hnenah hian SDRF hnuaia 'Ex-gratia Fund' atangin cheng Nuai li (4 laksh) a hlan a ni.

Pu Donny Lalruatsanga chuan Ruby Lalrinsiami'n vanduaithlak taka nunna a chan chu Sorkar leh a mimal ang pawha a tawrhpui takzet thu a sawi a. Thihna hial thleng a nih angin District Disaster Management Authority (DDMA) chuan a theih ang angin a bawhzui nghal a, SDRF hnuaia Ex-gratia Fund - in bituk a siam angin râlna hi hlan a ni, a ti. Bawrhsap chuan chhiatna hrang hrang thleng thinah DDMA - in theihtlawp a chhuah thin tih sawiin, hma lam hunah pawh thahnemngai taka hmalak zel a nih tur thu a sawi bawk.

Ruby Lalrinsiami, râlna hun hi MJA Lawngtlai District President Pu Elvis Lalthangzuala'n kaihruaiin, chhungkaw lam atanga thusawi ngishthlak a ni bawk a. An vanduaina tawha Sorkar leh khawtlangin an ngaihven leh chhawmdawlnaah lawmthu an sawi a ni.

Ruby Lalrinsiami (kum- 6) hi Zirtawpni tlailam khan ruah sur nasa tak karah Dawr a thil leitura a thiannu nen an kal chu Tuihawk luankawr ah chesual palhin metres 300 vel tuihawk hian lenin, chhan theih a ni ta lo a ni.  A tuk Inrinniah aruang enfiahin buaipui ngaite buaipuifel a nih hnuah Lawngtlai College Veng thlanmualah phum a ni.