3165/2024-2025

Dated Lawngtlai, 23rd November 2024 : Vawiin khan Pu Cheemala Siva Gopal Reddy, IAS, Lawngtlai bawrhsap chuan Sangau-IV lei tlahniam tlawhin, Disaster Management & Rehabilitation hnuaia Mitigation hnathawh leh hmalak dan a enfiah a, Far Pak Self Help Group-  te nen inkawmna an nei nghal.

Pu Cheemala Siva Gipal Reddy, IAS, chuan Mizoram leilung chu a ngheh loh bakah  ruahtui a tlak nasat avangin lei min leh chhiatna dang dang a thleng fo thin a ti a. Chhiatrupna lo thleng lakah nunna chân emaw thil tihchhiat tam lo tura hmalak kawngah DM& R hnathawh a fakawm hle a ti a. Khuarel chhiatna chu thleng thei reng a nih avangin tha thlah lo tur leh engtik lai pawha chhhanchuah hnathawk a chhuak thei tura in ral ring reng turin a chah a ni.

Bawrhsap hian Sangau IV - a lei tlahniam a tlawh nghal a.  Lei tlahniam avanga harsatna tawk mekte dinhmun a hriatthiampui tih tarlangin, Bawrhsap chuan theih ang ang a hmalak mek a nih thu a sawi a. Lei tlahniamin zual lam pan lo tura hnathawh chu thil pawimawh hmasa a nih thu tarlangin, Pu Cheemala Siva Gopal Reddy chuan Mizoram sawrkara DM&R hotute pawh chak zawk a hmalakpui  tura a nawr reng thu a sawi bawk.

Pu Cheemala Siva Gopal Reddy chuan Far Pak Self Help Group-  te kawmna nei bawkin, an hnathawh dan tlangpui sawipuina a nei a. Far Pak Self Help Group- ten a mamawhtute tana computer zirna  an buatsaih sak thin  chu thil lawmawm tak a nih thu sawiin, Mizoram sawrkar Certified an nihna chuan an hnathawh that zia a pholang chiang hle a ti. Bawrhsap chuan Mizorama SHG awm zawng zawng zinga Computer zirna buatsaih thei awm chhun an nihnaah thinlung taka a lawmpui thu sawiin, hmalam hunah pawh tha tak leh chak zawka hnathawk thin turin a chah nghal.

Pu Cheemala Siva Gopal Reddy hi Pu Zoramsiama Hmar, Addl. DC leh Pu Chinlianmanga, SDO (C) Sangau ten an tawiawm a. Nimin lama Citizen Care- Grievance Redressal Day' (Khua leh tuite Ngaihsak-Harsatna Chinfel Ni) an hman hnuiin Sangauah hian zan riakin vawiin hun hi an hmang leh a ni.