Lawngtlai, Khuangchawi thla ni 28, 2020: Lawngtlai Vengpui leh Vengpui-II Village Council huam chhungah mipui zinga COVID-19 kai hmuh belh zel a nih avangin, medical team te'n ngunthluk taka risk assessment an neih hnua Chief Medical Officer, Lawngtlai District rawtna angin vawiin khan Lawngtlai Bawrhsap Dr Andrew H. Vanlaldika chuan vantlang zinga hri inkai darh zel tur ven nan The Mizoram Epidemic Diseases (COVID-19) Regulations, 2020 leh Mizoram Sawrkarin Unlock Order 4.0 dt. 30.09.2020-a a tihchhuah behchhanin Lawngtlai khawpui chhunga veng pahnih - Vengpui leh Vengpui-II area-te chu dt. 29.10.2020 (Ningani) atanga thu leh awm hma zawng Containment Zone-ah a puang.

Containment area chhungah hian Deputy Commissioner, Lawngtlai leh a veng neitu VLTF-in phalna an pekte, dan leh thupek kengkawhtute, Medical Duty, Sanitation, PHE, Power & Electricity leh COVID-19 Executive duty-te, chanchinbu mite leh bawnghnute sem tih loh chu tu mah luh leh chhuah phal a ni lo va. Tul tawp a nih loh chuan containment area puanna veng mipuite pawh pawn chhuah leh inlen pawh loh tur tih niin, veng leh veng inkal pawhna kawng (main road) erawh tlan tlang phal a ni thung a. He thupek hi thu leh awm hma chu hman a ni ang.

Containment area-a puan tak veng pahnih huam chhungah hian October ni 16, 2020 atang khan quarantine centre-a khung hran ni lo zingah positive case 7 hmuh chhuah tawh niin, contact tracing team te'n contact an chhinchhiah atangin test neih chhoh mek zel a ni a. Containment area-a puan an nih chhung hian medical team te'n veng chhung in tin luh chhuakin, active case search an kalpui dawn a. Tun hnaia zin chhuak leh positive nena inhnim hnai te emaw, COVID-19 symptom anga ngaih theih insawiselna nei te emaw chu chhinchhiah zelin, SOP zulzuiin a tul dan azirin test an nei zel dawn a ni.