4222/2023-2024

2024 Vau thla ni 18: Lok Sabha Inthlanpui, 2024 neih hun tur puan a nih tak avangin March ni 16, 2024 khan Lawngtlai District Election Officer Pu Cheemala Siva Gopal Reddy chuan a hnuaia mi ang hian mipuite hnena ngenna thu a chhuah.

"Kan hma lawkah hian Lok Sabha Inthlanpui, 2024 chu kan nei dawn a. Hemi atan hian Election Commission of India chuan mipuite'n an harsatna te, sawisel duh an neih te, Electoral Roll chungchang leh inthlan chungchanga hriat duh an neih te awlsam taka an hriat theih nan hmanrua a rawn chhawp chhuak a. He'ngte hi ṭangkai takin mipuite'n hmang ṭheuh turin District Election Officer Lawngtlai chuan Lawngtlai District mipuite a ngen a ni.

1. District Contact Center: Hei hi hriat duh kan neih leh harsatna kan neihte thlenna hmun tur a ni. Hriat duh i neih chuan 1950 hi dial la, Mizo ṭawngin zawh duh ang zawh mai tur a ni. Eng tik lai pawha biak pawh theih turin thawktute'n an vil reng a ni.

2. cVIGIL App: Hei hi mobile phone hmangtute'n Playstore aṭangin download theih a ni a. Election chungchanga complain duh leh report duh neite chuan Election thuneitute hnena kal kher lo leh phone hmanga biak pawh kher ngai lovin report theh luh theih a ni. Thlalak nen lam theh luh theih vek a ni.

3. Voters Helpline App: Hei hi mobile phone hmangtute'n Playstore aṭangin download tur a ni a. Electoral Roll leh inthlan chungchanga mamawh apiang zawn chhuah mai theihna a ni. E-Roll-a mahni chanchin awlsam takin zawn chhuah theih a ni.

4. PwD App: Hei hi pianphung harsatna neite tan bika siam a ni a. Playstore aṭangin download a, kan unau rualbanlote Electoral Roll leh a kaihhnawiha inchhinchhiahna turin leh an harsatna sut kiansak an nih theih nan PwD App hi hmang turin puih ṭheuh ni se."