Ni 8.10.2018 khan Lawngtlai District Election Officer Pu N. Chakhai MCS chuan Lawngtlaia political party hrang hrang hruaitute a office chamber-ah ko khawmin, Mizoram MLA inthlan lo awm tur kaihhnawiha Mizoram chhunga model code of conduct (MCC) puan a nih tak chungchanga hriat tur pawimawhte a hrilhfiah.

Lawngtlai SP Pu Amit Goel IPS leh election official dangte pawh he hunah hian telin, Lawngtlai District chhungah MLA inthlan muanawm tak a awm theihna tur leh Election Commission of India (ECI) duhdan te tha taka zawm a nih theih nana tih tur leh tih loh tur hrang hrang an sawi ho va. Rualkhai tak leh inthlei bikna awm lova party tinin campaign an kalpui theih dan tur te lungrual taka sawi ho niin, kimchang leh chipchiar zawka thil inhrilhfiah leh hun atan 11.10.2018 (ningani) an ruat nghal.