Vawiin chawhnu dar 1 khan Lawngtlai District Information & Public Relations Officer thar Pu C.Lalhruaitluanga chuan a office chamber-ah Lawngtlaia thuthar theh darhtute nen inkawm hona hun a buatsaih.

Lawngtlai DIPRO thar Pu C.Lalhruaitluanga chuan chanchinbu mite'n amah an lo dawnsawn danah lawm thu sawiin, ram leh hnam hmasawn nan theihtawp chhuaha thawh hopuiah chanchinbu mite chu a sawm a. Mipuite'n sawrkar hma lakna leh kalphung an hriatna bulpui ber chu thuthar theh darhtute an nih avangin uar zawkin sawrkar thiltihte tarlang thin se tha a tih thu a sawi bawk.

He hunah hian chanchinbu mite pawhin sawrkar lam tih tur nia an hriat, an ngaih pawimawh hrang hrangte sawiin, Information Office kal tlang lova advertisement pek a nih loh nan hma la turin DIPRO chu an ngen a. Pu C.Lalhruaitluanga chuan a theih ang anga hma lak a tum thu chanchinbu mite hi a lo hrilh a ni.

He inkawm honaah hian chanchinbu mite chu District MJA President Pu ZD Dengngura'n a ho a ni.