2617/2022-2023
Sahmulphah thla ni 11, 2022: Lawngtlai District chhunga Agriculture Census vawi 11-na neih tur atan Field Work Phase-I hawnna leh Field Functionary-te tana training ni hnih awh chu Economics & Statistics Department buatsaihin Lawngtlai DC Conference Hall-ah leh MJA Press Club, Lawngtlaiah te nimin leh vawiin khan buatsaih a ni.

He hun hi Lawngtlai District Research Officer Pu Jimmy Lalkungliana Sailo chuan a kaihruai a. Agriculture Census chu kum nga dana neih thin a nih thu leh tun tum hi a vawi 11-na a nih thu te, phase thuma neih a nih tur thu te sawiin, Agriculture Census chu lo neitute hmasawnna atana thil tangkai leh ram hmasawnna atana thil pawimawh tak a nih avangin survey nei tur, enumerator-te chu fimkhur tak leh uluk taka hna thawk tur leh data leh information rin tlak chauh report turin a chah a ni.

Lawngtlai District-ah hian enumerator 25 an awm a. He training-ah hian Pu H. Lalkhawngaiha, Inspector of Statistics leh Pu PC Lalhuliana, UDC te'n enumerator-te hnenah zirtirna an pe a ni.

Agriculture Census vawi 11-na hi phase thumah neih tura ruahman a ni a. Kum danga la tih ngai loh angin, mobile phone hmangin survey hi kalpui tur a ni a. Heti anga survey kalpui hi India ramah chuan thil thar leh a vawi khatna tur a ni.

Attachment

  • Loading attachment...