Nimin khan Lawngtlai DC Conference Hall-ah Lawngtai District Task Force Immunisation chu an Chairman, Lawngtlai Bawrhsap Dr A. Muthamma IAS hovin an thu khawm a. District chhunga kal pawh harsa zual khuaahte Intensified Mission Indradhanush hnuaia hri danna pek dan tur an sawi ho.
He huna Chairman Dr A. Muthamma chuan Lawngtlai District mipuite hrisel nan hri danna lak that a pawimawh, a ti a. Thingtlang khaw kil khawr leh zuala mite’n hri danna lak an hreh thin chuan hriselna kawnga hma lak a tikhirh zual hle tih sawiin, thla bia hri danna (routine immunisation) pek phak lohna khuaah Mission Indradhanush chu hlawhtling taka kalpui tum a ni, a ti a. PowerPoint presentation hmangin hlawhtling zawka Mission Indradhanush kalpui a nih theih dan tur ruahmanna a sawi fiah nghal.
Lawngtlai CMO Dr Thani Pachuau, SMO Dr S. Thaizi leh WHO-a SMO Dr Lalhlimpuii te chuan Lawngtlai District-a Mission Indradhanush kalpui tawha hlawhtlinna leh harsatna awm te an sawi a. Member-te nen harsatna hrang hrang sut kian a nih theih dan tur leh hma lak dan tur te sawi ho a ni bawk.
Intensified Mission Indradhanush (IMI) Phase I Round 1-na hi October ni 7-14, 2017 chhung hian kalpui tur a ni a. District chhunga kal pawh harsa zual khaw 77 tuam tum a ni. He’ng khuaah te hian hri danna pek a nih ngei theih nan leh mipuite’n an dawn duh ngei theih nan BDO te, Medical Officer te, a petu tur health worker te, ASHA te, anganwadi worker te, VC leh tlawmngai pawlte bakah sakhaw rawngbawltute chu a theih ang anga thawk ho turin beisei an ni a. He’ng zinga a thawk tha berte chu Republic Day-ah lawmman siamsak tum a ni.
He meeting-ah hian health lama thawktute bakah, Tuichawng bialtu MLA Dr BD Chakma te, Block hrang hranga BDO te, Social Welfare Department lam te, World Vision India ai awh te, tlawmngai pawl leh kohhran ai awh te pawh an tel a ni.
