Nimin khan Lawngtlai DRDA leh Krishi Vigyan Kendra (KVK) Lawngtlai te tang kawp huaihawtin Lawngtlai-III-a CYLA Hall-ah India sawrkar hma lakna thar New India Movement chungchang zir ho a ni a. H&TE changtu Parliamentary Secretary Pu H. Zothangliana chu Khuallian a ni.

Pu H. Zothangliana chuan sawrkarin kum 5 chhunga ram hmasawnna chak zawka kaltir a, kut hna thawktute thar chhuah a leta tipung a, India ram thar (New India) din turin hma a la a. A hlawhtlin nan ram hruaitute, sawrkar hna thawkte leh kuthnathawktute’n mawhphurhna kan nei theuh a ni, a ti a. Ramin hma a sawn tak tak dawn chuan kut hna thawktute’n hma an sawn phawt a ngai a ni tiin, sawrkar hma lakna leh thahnem ngaihna kan tawmpui phak loh thin avangin hma kan sawn chak thei lo fo a ni, a ti a. Kum 2022-a kut hna thawktute lak luh a leta tihpun leh New India Movement-in a tum dangte chu a taka tihhlawhtlin theih a ni tiin, a bik takin kut hna thawktute’n a taka chantir turin mawhphurhna an nei a, mi thiamte rawn peih pawh a pawimawh hle dawn a ni, a ti a. Hemiah hian mipuite chu duat ngai, khawngaih ngai, hmangaihna nena enkawl ngai an nih hre thiam turin sawrkar hna thawkte chu a chah bawk.

He hun hi KVK Lawngtlaia Scientist Pi Esther Zonunpuii chuan a kaihruai a. Lawngtlai DRDA Project Director Pu R. Lalremsanga MCS chuan kal khawmte lawmna thu a sawi a. KVK-a Scientist Pu C. Rualthankhuma chuan New India Movement awmzia a sawi fiah a. Kut hna thawktute atangin thu sawi ngaihthlak a nih bakah, New India Pledge (thutiam) sawi rual a ni a. Lawngtlai BDO Pu Zoramsiama Hmar chuan lawm thu sawiin, hun khar a ni.

New India Movement hi kum 1942-a India ram zalenna sualtute’n Quit India Movement an huaihawt leh a hnu kum 5-a India ramin zalenna a lo neih tak dan hre rengin, Quit India Movement kum 75-na, kum 2017 atanga kum 5 chhungin retheihna, hlemhletna, rawlrala chetna leh chi inthliarna te awm lohna ram, ram fai leh thianghlima India ram thar din chhuak tura sawrkar laipui ruahman a ni a. Kum 2022-ah chuan he dinhmun hi thlen hman ngei tum a ni.