1417/2023-2024
2023 Thlazing ni 8: Fur khaw cheng leh ruah sur nasa avangin Lawngtlai-III lei tla hniam (sinking area) tia hriat ṭhin, National Highway-54 kawngpui chhak lam, Lawngtlai-III leh Electric Veng huam chhungah nimin aṭang khan lei a chet nasat leh deuh avangin tukin khan District Administration aṭangin Lawngtlai Additional Deputy Commissioner Pu Abraham Beirazi Khithie, DRDO Project Director Pi Marilyn Rualzakhumthangi leh Sub-Deputy Commissioner Dr Doris Lalrinawmi te chuan lei chetna hmun hi tlawhin, an enfiah a. Bialtu MDC Pu T. Lalengmuana leh khawtlang hruaitute nen hma lak dan tur ruahmanna siamin, an ruahmanna angin he lei chein a nghawng chhungkaw 17 chu vawiin khan hmun him lamah suan chhuah an ni a, Electric Veng chuan vantlang hnatlang kovin, mi tlawmngai thawk chhuakte'n an bungruate hi an awm lailawkna tura ruahmanah an thiar lut a ni.

Lawngtlai-III lei tla hniam bakah hian Lawngtlai District chhunga ruah sur nasa avanga tui lian leh lei minin a tihbuaite chu District Disaster Management Authority (DDMA) lam aṭangin a ṭul anga ngaihven niin, State lamah incident report pek zel a ni a. DDMA aṭanga Incident Commander ruatte chuan mahni bial chhunga harsatna thlengte a hmunah tlawhin, silpauline an pek bakah, harsatna sut kian thuai a nih theih nan leh chhiatna nasa zawk a thlen loh nan hma an la nghal zel a ni.

Indian Meteorological Department, National Weather Forecasting Centre, Govt of India-in 7th - 13th August, 2023 chhung hian ruah nasa taka sur tur leh Lawngtlai District bikah sur tam zual tura a tar lan avangin Lawngtlai DDMA chuan vawiin vek khan "Mipuite hnena ngenna leh hriattirna" chhuah nghalin, hemi chhung hian ṭul bik thil, damlohna leh emergency thil tak tak a nih loh chuan mipuite mahni chenna veng leh khua chhuahsan lo turin leh zin veivak rih lo turin an ngen a. Khuarel chhiatna thleng thei laka an him zawk nan mipuite chu chi-ai lo va, inralring reng tur leh mahni bul hnaia ṭanpui ngai an awm chuan ṭanpui ṭheuh turin an sawmin, an ngen bawk a ni.

Hei bakah hian Lawngtlai DDMA chuan "Hriattirna" dang tichhuak bawkin, fur ruah tui tlak tam lai a nih avangin mipuite an lo inhmakhua a, chhiatna thleng thei laka an lo inven lawk theih nan mahni in leh lovin thli leh ruah a dawl theih nan a ṭul anga thawm ṭhat ngai laite thawm ṭha tur te; thing leh mau, thliin a len thluk mai theih, electric hrui leh chenna in delh mai thei te kit/a zar thlak tur te; tui luan kawr mumal tak siam tur te; tuidawn ṭha tawk tak siam tur te; mahni ram chhung leh in bula lei min mai thei a awm a nih chuan ruahtui lut lo tura khuh hul ṭha tur te; in sa lai/in sakna hmun tur lai mekte chu fimkhur tur te; ṭhenawm khawvengte tana rimchhia leh lei min hlauhawm tur khawpa chenna in hnaiha vawk in sa lo tur te leh khuarel chhiatna a lo thlenin mahni bialtu Incident Commander-te hnenah report theh lut thuai tur tein mipuite hriattirna tihchhuah a ni.

Attachment

  • Loading attachment...