2767/2024-2025

Dated Lawngtlai, 30th October, 2024 : Vawiin chawhma dar 11 khan Lawngtlai District Agricultural Marketing Committee (DAMC) chuan  an Chairman leh District bawrhsap nibawk Pu Cheemala Siva Gopal Reddy, IAS, kaihruaiin DC Conference Hall- ah thutkhawm an nei.

Pu Cheemala Siva Gopal Reddy, IAS  chuan DAMC Member lo kalte hnena lawmthu sawina a nei hmasa a. Mizoram sawrkarin  Bâna Kaih (Handholding Policy) a kalpui mekah atak a hlawhtlinna hmu tur leh Huan/ Lo neituten hlawkna tak tak an neihna turin DAMC in a tih tur ang angte tha taka a tih a tul hle a ti a. Thlai thar zawrhna turin  Mizoramah Market - a lian tawk lo thin hle tih tarlangin bawrhsap chuan DAMC hmalaknain market lian leh fel fai zawk a awm a beisei thu a tarlang. Pu Cheemala Siva Gopal Reddy chuan DAMC kaltlanga Loneitu Pawl, Primary Collection Centre leh Secondary Collection Centre -te fel fai taka din a nih chuan market changtlung leh tha  tak a awm thei dawn a, thlai thar lei leh hralhah thlai thartuten man man zawka hralhin, hlawkna tak tak an nei tawh ang, a ti. Lawngtlai District chhunga Sawhthing, Aieng, Hmarcha leh Hmunphiah chingtuten hlawk zawka an hralh chhuah theih  tura theihtawp chhuah turin DAMC Member- te a sawm nghal bawk.

Vawiin thutkhawmah hian thupawimawh tak tak sawiho a ni a. Mizoram Agricultural Marketing Board (MAMB) in  Lawngtlai District  tana Loneitu Pawl (Farmer's Co-Operative Society) - 56 an pawm chu zirchian leh a, a  hma thei ang bera pawmpui ni se an ti a. Thlai thar lakkhawmna hmun - Primary leh Secondary Collection Centre - dahna tur hmun chu data lakkhawm mek a nih angin, data lakkhawm zawhah thlangfel ni se an ti. Thlai thar lei, hralh leh lakkhawm chungchang inzirtirna khaw tinah  neih ni se an ti a, hemi atan hian Line department leh BDO ten khawtina Village Coincil (VC) thawhpui a, a tul ang a vantlang inkhawm (Gram Sabha) koh thin ni se an ti bawk.

Vawiin Lawngtlai District Agricultural Marketing Committee (DAMC) thutkhawmah hian Member leh Line department an tel kim tha hle a, Pu Cheemala Siva Gopal Reddy, IAS, Chairman, DAMC chuan lawmthu sawina neiin hun a khar.