Vawiin khan Lawngtlai BNRGSK Hall-ah Lawngtlai District huam chhunga NLUP thawh thumna leh thawh lina sem tan inkhawm chu Lawngtlai District Bawrhsap Pu J.Hmingthanmawia kaihhruaiin neih a ni, Pu C. Ngunlianchunga, CEM, LADC chu khuallian a ni.

Thusawiin khuallian chuan Pathianin mirethei, michanhai leh hmeithaite chu fel taka ngaihtuah a, enkawl tura min tih angin Mizoram sawrkar chuan chung miten leirem an lo rah a, hmasawnna kawl eng an lo hmuh ve theihna tura bul tanna tur min pe chu thil lawmawm tak a ni a ti a. Mi harsa, bul tanna tur neilo mi tam tak ten sumdawnnate, ar vulh a bul tanna turte, vawk vulha hma khua kan suih ve na turte leh thil dang dang kan tui zawng leh theih zawng kan thlan ang zelin kan dawng ta a ni a ti a. Hetih rual hian Pathian thu vekin mihringte chu beka thlantui luanga mahni intungnung tura min tih angin a dawngtute pawhin dik tak leh fel taka kan pawisa dawnte kan hman a, taima taka hna kan thawh ve chu kan tihmakmawh nia a hriat thu a sawi bawk.

Inkhawm kaihruaitu District Bawrhsap Pu J.Hmingthanmawia pawhin NLUP a hlawhtlin theih nan hian sawrkar lam chuan mahni zawn theuhah theihtawp a chhuah tak zeta a hriat thu a sawi a, a dawngtu kal khawmte chu fuihin hetiang anga bul tanna tha kan dawng chung pawha kan la hlawhtlin pui lo a nih chuan thildang pawh lokal se kan hlawhtlin pui a rinawm vak chuang loh a a hriat thu a sawi, Pathian hre reng chunga dik tak leh fel taka an pawisa dawnte chu hmang theuh turin kalkhawmte chu a chah a ni.

He NLUP thawh thumna leh thawh lina ah hian Vety leh Industry Department atangin chhungkaw 15 ve ve, Fisheries, Agriculture, Horticulture, Sericulture, Forest leh Soil Department te atangin chhungkaw panga theuh, an vaiin mi 60 hnenah hlan an ni a, khuallian Pu C. Ngunlianchunga’n chhungkaw 30 hnenah hlanin a dang chhungkaw 30 te chu Bawrhsap Pu J.Hmingthanmawia’n a hlan thung a ni.