Vawiin nileng khan Serchhip DC Conference Hall-ah “Media Certification and Monitoring”, “Systematic Voters Education & Electoral Participation” leh “Election Expenditure Monitoring” chungchangah training buatsaih a ni a, he hunah hian Serchhip District chhunga Election Official pawimawh, RO, ARO, AERO-te bakah tlawmngai pawl hrang hrang aiawhte, MPF aiawhte leh MJA aiawhte an tel a ni.

Training kaihruaitu Pi Juhi Mukherjee, IAS, District Election Officer, Serchhip chuan Mizoram inthlanpui lo awm tur atan Election Commission of India chuan ruahmanna thar chi hrang hrang a duang chhuak a, hengte hi inthlanna felfai leh thianghlim kan neih theihna tur atana zawm ngei ngei ngai tur a nih avangin official te, mipui aiawhte leh thuthar lakhawmtuten an hriatchian a, an zirchian hmasak a pawimawh a, midangte zirtir chhawng tur leh hrilh chhawng tur an nih avangin an pawimawh a ni a ti.

Training hi chhawng thumah then niin Pu Lalsangliana, MCS, Addl. DC chuan “Election Expenditure Monitoring” chungchangah zirtirna a pe a, Pu Lalhmansanga MCS, Election Officer chuan “Systematic Voters’ Education and Electoral Participation (SVEEP)” chungchang zirtirin Pu Andrew H. Lalremruata MIS, District Information & Public Relations Officer, Serchhip chuan “Media Certification and Monitoring” chungchangah zirtirna a pe bawk a ni.