2763/2023-2024

Lawngtlai dated 8th November 2023: Vawiin khan Lawngtlai district chhung a 36-Tuichawng, 37-Lawngtlai West leh 38-Lawngtlai East Assembly Constituency-a Polling Station 181-a vote tlak dan, General Observer ho a endikna ‘Post Poll Scrutiny’ neih a ni a. Returning Officer, Election Official leh Political party aiawhte he hun ah hian an tel a ni. Polling Station hrang hrang a vote thlak nana hman EVM leh VVPAT-te hi nizan atang khan Govt. Lawngtlai College-ah dawn khawm tan niin tukin chawhma khan Polling party-te hi an lo thleng kim a ni.

Vawiin a Post Poll Scrutiny neih zawh hian Polling Station tin a vote tlak dan endik niin 36-Tuichawng AC ah vote 29612 tla ang a chhinchhiah a ni a, hei hi za zel ah 82.16% ang a ni. 37-Lawngtlai West AC ah vote 24502 tla ang a chhinchhiah niin hei hi 83.07% a ni a. 38-Lawngtlai East AC ah vote 19564 tla ang a chhinchhiah niin za zel ah 75.53% tla ang a ni.

Polling station-a inthlan buatsaihnaa thil fel lo complaint awmna emaw; EVM kaihhnawiha harsatna thlenna emaw; polling station-a vote thlak zinga an nihna finfiah nana EPIC aia ID Card dang hmang 25% aia tam an awmna emaw; assembly constituency khata vote tlak dan chawhrual aia za zela 15-a tam emaw, za zela 15-a tlem emaw vote tlakna polling station emaw; Election Commission of India-in enfiah ngai criteria a siam anga enfiah ngai polling station-te chu post-poll scrutiny hun ah hian endik an ni ṭhin a ni.

Vawiina post-poll scrutiny neih zawh hian General Observer leh official-te chuan constituency tin strong room kalh leh seal hmang a char fel tawh chu an enfiah leh a. Political party aiawhte awm laiin inthlanna lehkha pawimawh (election paper) dahna strong room pawh kalh a, seal hmang a char fel nghal a ni bawk.