1199/2026-2027

Lawngtlai, 25th June 2026: Vawiin khan Lawngtlai District Cooperative Development Committee chuan an Chairman leh bawrhsap nibawk Pu Donny Lalruatsanga kaihhruaiin a Office Chamber-ah thutkhawm an nei.

Pu Donny Lalruatsanga chuan Cooperative Society- te hmasawnna turah kawng hrang hrangin hmalak mek a ni, a ti a. Cooperative Society - chu mi tam takin an chakna inzawmkhawm a, an nun leh khawtlangah hmasawnna an thlenna a nih angin, pawl chak tak a ni a, ram leh hnam hmasawnna thlentu pawimawh tak a ni, a ti a. Cooperative Society - kalphung mumal zawka mipuite hnenah puanzar a tul hle tiin, hemi kawngah hian 'Awareness Campaign' tam zawk neih pawh a tul hle a ti a. Bawrhsap chuan Lawngtlai District- a Cooperative Society hrang hrangte mahni zawn theuha theihtawp chhuah tur leh mimal leh ram hmasawnna thelntu ni ngei turin a chah nghal bawk.

Thutkhawmah hian LADC leh CADC-a Cooperative Department atangin report - ngaihthlak a ni a. CADC - hnuaiah 'Awareness Campaign' tum hnih kalpui tawh niin, Cooperative Society - tan cheng nuai hnih dawn a nih thu ngaihthlak a ni a. LADC - hnuaiah Registered Society - 102 awm mekin, chak taka 'Awareness Campaign' kalpui mek niin khaw 30 ah neih a nih thu ngaihthlak a ni bawk.

Thutkhawmah hian thil pawimawh tak tak sawiho a ni a. Cooperative Society - tha leh rintlak tak din zel chu thil pawimawh tak a ni tih pawmtlangin, hemi kawngah hian theihtawp chhuahho zel ni se an ti a. Awareness & Sensitisation Training' pawimawhna sawiho niin, NABARD leh MCAB - ah te ziaka thlen ni se an ti a ni. PMBJK hnuaia man tlawm zawka Damdawi zuar tura License pekchhuah tura Cooperation Department, LADC hmalakna kal mek chu bawhzui chhunzawm zel ni se an ti a, Lawngtlai District- ah Cooperative Union din tura chak zawka hmalak ni se an ti a ni. Cooperative Auditor -nei tur te, Cooperative Bank Branch - ten loan pechhuak tha turte leh 'Bana Kaih' hnuaia 'Project' kalpuiah Society mumal tak din tur ten hmalak ni se an ti bawk a ni.

Vawiin thutkhawmah hian Lawngtlai District Cooperative Development Committee Member- te an telkim tha hle a, Chairman Pu Donny Lalruatsanga chuan lawmthu sawiin hun a khar.