1941/2023-2024

Lawngtlai dated 19th September 2023: Vawiin chawhma khan DC Conference Hall, Lawngtlaiah thla thum dan a kalpui thin, Bank hrang hrangte leh Sawrkar Department thawh ho dan leh mipui leh Bank indawrtawnna kalpui dan thlirletna, District Consultative Committee chuan thutkhawmna an nei a. Pu H.Lalhmingthanga, Deputy Commissioner chuan hun kaihruaiin Pu JM Soren, Manager, Lead Bank Office, Lawngtlai chuan thu rel tur hrang hrang sawi zauna hun a hmang a. Lawngtlai district chhung a Bank hotute leh Bank nen a thawhhona hrang hrang nei Sawrkar office-a thawktute an tel bawk a ni.

Pu H.Lalhmingthanga, Deputy Commissioner chuan Bank chu nitin a mipui indawrtawnna hmun lun leh pawimawh tak a nih angin Lead Bank Office bultum a thla thum dan a kan hmalakna hrang hrang thlirletna hun neih a ni thin chu lawmawm a tih thu a sawi a. Bank a thawktute leh mipuite indawrtawnna kawng a harsatna awm thin te chu min dawrtuten kan harsatna an hriatthiam theih nan kan harsatnate chiang tak a hrilhfiah thin a pawimawh thu a sawi a. Hemi kawngah hian Thutharlakhawmtute hmang tangkai turin leh Social media-te hmang thiam turin a chah bawk a ni.

Pu JM Soren, Manager, Lead Bank Office, Lawngtlai tarlan danin Lawngtlai district-ah hian Bank branch 12 an awm mek a, ATM 5 awmin Bank awm lohna khaw hrang hranga Bank nen a indawrtawnna kawng a mipui puitu tur Business Correspondent 84 an awm a, Financial Literacy Centre pakhat a awm bawk a ni. April atang a June, 2023 chhung khan Bank kaltlang a Account hawn dan te, Loan dil dan leh thil tul hrang hrang inzirtirna leh Sawrkar hnuai a Bank kaltlang a hamthatna awm inhrilhhriatna, Financial Literacy Campaign tum 29 kalpui a nih thu tarlan a ni. Pradhan Mantri Suraksha Bima Yojana leh Pradhan Mantri Jeevan Jyoti Bima Yojana-a mi tam zawk an inziahluh theih nan hemi hnuai a hmaṭhatna awmte zau zawk a inzirtir a pawimawh thu te, kuthnathawktute dawmkanna tur a Veterinary, Agriculture leh Fisheries department nen ṭangkawp a loan dawmg tur a mi rintlak thlan chhuah kawng a thawhho dan tur te, Self Help Group tihhmasawn nana chak zawk a loan pek chhuah dan turte sawi ho a ni a. MUDRA loan diltu awm dan leh Bank hrang hrang a loan rul ṭha duh lo awm zatte en ho a ni bawk.

Lawngtlai district chhung a Bank kaltlang a sum dahluh leh puk tur a pek chhuah chhutna, Credit Deposit Ratio chu 112.76% a nih thu tarlan niin hei hi Mizoram chhung district hrang hrang zingah a ṭha ber pawl a nih thu sawi a ni a. ATM chhiat chhan leh siamṭhat dan tur te sawi ho niin SBI ruahmanna in Chandmary vengah ATM bun thar tur a hmalak mek a nih thu leh khawl ṭha ngaihchan mek a nih thu sawi a ni. Mipuiin harsatna an tawh loh nan India pawisa cheng 2000 note tih thih a nih dawn avangin September ni 30, 2023 thleng Bank-ah dahluh theih a nih tur thu sawi a ni a, Bank hrang hranga venhimna kalpui a nih dan te sawi a ni bawk.