1942/2023-2024

Dated Saitual the 19th September 2023 : Vawiin khan Saitual District Deputy Commissioner Conference Hall ah Imanuel Lalawmpuia(L) S/o Pu Ronald Lalchhuanawma, India rama civil mite tana huaisenna chawimawina sang ber Sarvottam Jeevan Raksha Padak Award Citation leh medal hlanna hun hman a ni.

He huaisen chawimawina in a ken tel Citation leh Medal hlantu Saitual Bawrhsap Dr Lalngura Tlau chuan an hun hman chu mi ropui chawimawina na hun a ni, a ti a, Saitual District chhunga India rama civil mi, mi huaisen te tan a chawimawina sang ber dawng thei an awm chu a ropui a takzet a ni, a ti. Bawrhsap chuan huaisen chawimawina chu chi thum a awm thu sawiin, chung zinga sang ber chu midang tana nunna va hlan Sarvottam Jeevan Raksha Padak Award chu a ni, a ti. Khawtlang hruaitu te pawh Jeevan Raksha Padak Medal Immanuel an a lak theih na tura an hmalakna ah fakawm a tih thu sawiin, Mizoram hmun dangah pawh chawimawina dawng thei tur, hmalak dan tur hriat loh vang a dawng lo an awm leh zeuh thin chu a pawi a tih thu a sawi bawk.

He chawimawina inkhawm ah hian Pu Ronald Lalchhuanawma, Immanuel a pa pawh in thu sawiin, an fapa chu tlangval nungchang zawi leh nu leh pa thuawih thei tak a ni, a ti a. An channa chu an chhungkaw tan tawrhna nasa tak nimahse an fapa in midang te nunna chhanna atana a nunna a hlan chu an chhuang takzet a ni, a ti.

Imanuel Lalawmpuia(L) hi Pu Ronald Lalchhuanawma leh Pi Lalfakawmi te fapa niin, nunna a chan lai hian BA 6th Sem a zir mek a ni. C Lalthlamuana, President YMA Mualpheng in a tarlan dan in Tv. Imanuel Lalawmpuia(L) leh athiante hi April ni 2, 2022 khan Mizoram Sahuan ena an kal hawlam Tlawnglui Sihhmui kai ah inchiahdai leh tura an kal chu a thianpa Larry Lawmnakima chu tuiah tla in a talbuai a, a thianpa chhan tur hian athianpa awmna lam panin rang takin tui a hleuh nghal a, theihtawpa chhan tuma a beih avangin a thianpa chu vaukam lamah a in hai chhuak thei a, Immanuel Lalawmpuia erawh chu athianpa a chhanna lamah tui khauh tak chuan a la zui ta a ni.

Sarvottam Jeevan Raksha Padak Award hi India ramin mi huaisen te, hun leh hmun harsa tak kara mahni nunna hial thapa midang nunna chhanchhuaktute hnen a a hlan thin a ni a. Award hian Medal, Citation leh Pawisa fai cheng 200000 a keng tel a ni.

Vawiin Medal leh Citation hlanna puala inkhawm hi Pu Remlalliana Hnamte, SDO sadar Saitual chuan kaihruaiin, Saitual DC office staff te leh Imanuel Lalawmpuia chhungkhat leh thenrual hnai te an tel a ni.