Hospital fai inelna Kayakalp Award 2017-a Lawngtlai District Hospital-in pahnihna (2nd prize) leh hmasawn ber (most improved) award an dawn lawmna chu nimin khan OPD building tualah an buatsaih a. Lawngtlai East bialtu MLA Pu H. Zothangliana chu Khuallian a ni.
Khuallian chuan Lawngtlai District Hospital-in state pum inelnaa dinhmun sang tak an luah thei chu lawmawm a tih thu sawiin, thawktute inpekna a fak a. Tihtak zeta beih chuan thil theih loh a awm lo tih sawiin, a bul tan turte'n bul an tan tawh chuan, mipui lam atanga thlawpna leh thawh hona tha a awm a pawimawh a ni, a ti a. Tuna District Hospital hlawhtlinna chu kawng dangah pawh District mipuite tana entawn tur tha tak ni zel se a duh thu a sawi bawk.
He award lawmna inkhawm hi Rev. C. Chanchinmawia'n hunserh hmangin Pathian hnenah a hlan a. District Medical Superintendent Dr Lalmalsawmi Hmar chuan kal khawmte lawmna thu leh Kayakalp award chungchang a sawi a. Khual zahawm LADC CEM Pu T. Zakunga leh Electric Veng VCP Pu K. Laldinmawia te pawhin thu an sawi a. Kayakalp Choir leh doctors' live band zai te ngaihthlak niin, Medical Officer Dr Lalmalsawma chuan lawm thu a sawi bawk.
He hunah hian Sugar & Spices-in lawmpuina cake pathum an siamsak chu Khuallian-in zaiin, ei ho nghal a ni a. Central YLA, MJA Lawngtlai District leh Christian Hospital Lawngtlai te'n lawmpuina thuziak an hlan a. District Hospital-in khawlaia hun tur bawlhhlawh bawm an lei chu, Lawngtlai khawpui chhung YLA branch hrang hrang 12 hnenah sem a ni a. Tlai lamah award lawmna chawhlui kil ho nghal a ni.
He hunah hian LADC-a member-te, state leh LADC official te, health department leh District Hospital-a thawktute, VC leh tlawmngai pawl hrang hrang hruaitute an tel a ni.
