Vawiin khan Mizoram Governor Lt.Gen.Nirbhay Sharma chuan National Integration Tour a kal zirlai naupangte a chenna inah a kawm.

Mizoram Governor Lt.Gen.Nirbhay Sharma chuan an zin chhunga an thil tawn hrang hrangte zawtin zirlai naupang aiawhin mi pahnihin an cham chhung report an pe a. Governor chuan Assam Rifles-in rem hre taka thingtlang kilkhawr zawka cheng zirlaite tan a thlawna India ram khawpui ber fang tur leh India rama mi pawimawh ber berte hmuhpuia an hruai chu lawmawm a ti a. Zirlaite chu an zinchhunga an thil tawnah thil tha leh tha vaklo te pawh a awm thei a, an thil tawn apiang hian an nunah a tha zawngin zirlai tha tak a zirchhuah tir a beisei thu a hrilh a ni.

January 21 atanga February 8 chhung khan 23 Sector Assam Rifles chuan Mizo zirlaite tan Delhi khawpuiah National Integration Tour a buatsaih a. He tour-ah hian Aizawl District, Lunglei District, Champhai District leh Serchhip District atangin pawl 8 atanga pawl 10 zirlai mipa 9 leh hmeichhia 9 bakah zirtirtu pahnih an kal a. Major Dhruva Gaur leh Sub. Manvar Singh-ten an ho a ni.

National Integration Tour-a kal te hian January ni 21 ah Champhai an chhuahsan a, Silchar atangin train-ah chuangin New Delhi chu January ni 25-ah an thleng a. Delhi an cham chhung hian hmun pawimawh tak tak fangin Republic Day lawmna New Delhi a neihah an tel ve bakah India President Ramnath Kovind chu January ni 31 ah a chenna in Rastrapati Bhavan-ah an hmu a. President hian zirlaite tan thingpui ruai buatsaih sakin Assam Rifles Memento "Dhai Moorti" chu President hnenah an hlan. Union Minister of State for Home Affairs Kiren Rijiju an kawm bakah Indian National Shooting Team te pawh hmuh pui an ni bawk.