Lawngtlai District-a AH & Vety Farm awm chhun, AH & Vety Farm, Mampuia ar awp keutirna (hatchery) khawl thar bun a nih hnua a vawi khat nan nimin piah inrinni khan ar note, rainbow rooster layer chu awp keutir a ni.

He huna artui sangkhat awptir atangin 620 a keu a, chu chu za zela 62 a ni. He'ng arte te hi Mampui leh Lawngtlaiah pakhat Rs 40 zela hralh chhuah nghal a ni.

Mampui Vety Farm-a ar awp keutirna hi khatih laia Chief Minister Pu Lal Thanhawla chuan November ni 30, 2016 khan a lo hawng tawh a. Khawl lamah chiang lo a awm avangin vawi 2 chauh ar note awp keutir a nih hnuah khawl thar lei leh a ni a. Hemi chawm tur hian Power Line Transformer thar dah ni bawkin, khawl thar hian vawi khatah artui 2500 a awp keu thei tih Lawngtlai District AH & Vety Officer Dr B. Zonghinga chuan a sawi a. Tunah Layer awp keutir a ni a, a tul dan azirin a chi dangte pawh la awp keutir tum a nih thu a sawi bawk.

Mampui Vety Farm-a ar note awp keutirna hian a nihna ang taka hna a thawk a nih chuan ar note thar chhuah kawngah Lawngtlai District bakah Siaha District te pawh chawm thei tura beisei a ni.