Vawiin hian Serchhip District Road Safety Committee te chu an Chairman Pi Sangchhin Chinzah hovin a pisaah an thukhawm a.  Road Safety Week vawi 30 na ni 27.5.2019 atanga 2.6.2019 inkara lo thleng tur hman dan tur an rel.

Pi Sangchhin Chinzah chuan, Mizoram Road Safety Council in kumina Road Safety Week hman hun atan 27.5.2019- 2.6.2019 a ruat thu te, tun tum hi Road Safety Week vawi 30 na tur a nih thu te leh kumin thupui  atan “Lamliana himna hi Nun himna a ni” tih thu thlan a nih thu te a sawi a. Road Safety Week hlawhtling tak Serchhip District a hman a nih theih nana ruahmanna tha tak siam a tul thute member te hmaah a sawi hmasa a. Chumi hnuah Member Secretary Pu B. Lalrinsanga, DTO chuan Mizoram Road Safety Council rorel te leh kum hmasa lama Week kan lo hman tawh dan te sawifiahna a nei a ni.

Committee hian ni 27.5.2019 hian a hawnna inkhawm DC Conference Hall ah neih an rel a. Week chhungin lirthei khalhtuten dan an zawm tha em tih uar taka endik ni se, document fel lo leh kum tling lova lirthei khalh chingte phei chu uluk leh zual ni se an ti. Pathianni ah inthlahdah an tam deuh nia sawi a awm vanga Serchhip Police ten Pathianni vawi hnih lai uluk taka lirthei an lo endik tawh chu lawmawm an tih thusawiin hei hi chhunzawm zel ni se an ti bawk. Week chhung hian lirthei khalha eizawng te tan training buatsaih leh tur a ni ang a, ZDU nena tangkawpin driver tha thlanna pawh buatsaih leh tur a ni ang.

Heng te bakah hian State Road Safety Council-in Week chhunga hmalakna tur a ngaih pawimawh zualte chu tha taka tih vek tum ni se a ti a, chumi atana mawhphurtu turte pawh vawiin hian siam fel nghal a ni bawk.