1935/2024-2025

Lawngtlai the 6th September, 2024 : Vawiin chawhma dar 11 khan 'Lawngtlai District Sports Committee'  chuan DC Conference Hall- ah thukhawm an nei a, Pu Cheemala Siva Gopal Reddy, IAS, Deputy Commissioner leh Chairman, Lawngtlai District Sports Committee nibawk  chuan thutkhawm hi a kaihruai.

Pu Cheemala Siva Gopal Reddy chuan Sports Association aiawh lokalte lawmna thu sawi hmasain rilru leh taksa hriselna nei turin infiamna a pawimawh hle tiin infiamna lam uar zawka kalpui tura hmalak zel pawh a tul hle a ti. Vawiin thutkhawma Sports Association tam zawk an lo kallo chu pawi a tih thu tarlangin, District Bawrhsap chuan Association hruaitute chuan tan an lak thar a ngai hle a ti a. Sports Promotional Fund kaltlanga tanpuina awm ang angte pechhuak turin fimkhur a ngai hle a, sports discipline hrang hrangte an mamawh ang a pekchhuah tur a nih angin, Sports Association- ten pawisa an dil chhan 'District Sports Commitee' in uluk taka ngaihtuah leh rel ngai a nih laia Sports Association thenkhat an awm lo thin chu pawi a tih thu sawiin, ching chhunzawm tawh lo turin a chah a ni.

Pu Cheemala Siva Gopal Reddy, chuan 'Sports Promotional Fund' atanga tanpuina sumfai pek chhuah ang angte chu  Sports Association-te'n tha tak leh fel fai taka hmang turin a chah a. Lawngtlai District chhunga infiammite hmakhua ngai tak leh an hmasawnna tura  theihtawp chhuah kawngah thawhhona tha tak awm zel turin a sawm nghal bawk.

Vawiina 'Lawnglai District Sports Committee' thutkhawmah hian Sports Association atanga tanpui dilna lut zingah Mizoram Level Competition-a kal Association pahnih - Lawngtlai District Carom Association hnenah cheng 15,000 leh Lawngtlai District Taekwondo Association hnenah cheng 20,000 pek rem tih a ni a. Lawngtlai District Chess Association-ten Deputy Commissioner's Trophy an buatsaih turah cheng 20,000 in tanpui nise an ti bawk.

Vawiin Lawngtlai District Sports Committee thutkhawmah hian Lawngtlai District Sports Association atangin - Taekwondo, Basketball, Boxing, Carom leh Chess Association-te tel theiin, Ex- Officio Members ten an telpui bawk.