1934/2024-2025

Aizawl, 6^th September, 2024 : Land Revenue & Settlement Department chuan an minister Pu B. Lalchhanzova hovin vawiin khan Aijal Club Conference Hall-ah SASCI hnuaia scheme kalpui dan tur zirhona “Workshop on Implementation of scheme for Special Assistance to States for Capital Investment (SASCI)” hun an hmang a, Revenue Department hnuaia officer zawng zawngte an tel a ni.

He hun hmanpuitu minister Pu B. Lalchhanzova chuan Land Revenue & Settlement Department hnuaia thawktu zawng zawngte chu Mizoram tana rohlu, mipuiten malsawmna an dawn theihna tura ban pawimawh tak an nih avangin; Revenue hnuaia dan leh inkaihhruaina chi hrang hrangte chu mipuite tana awlsamna thlentu leh an ban phaka chhawpchhuah a nih theihnan a tul anga siam rem a tul a ni a ti a.  Dan awmsa kan hman mekte chu khawilaiah hian nge siam that zeuha mipuite tana phurrit a chhawk zangkhai theih ang tih ngaihtuah reng a tul a, Revenue lamah mithiam bik an nih avangin an thiamnate hmang tangkaia ngaihtuahna seng turin a chah a, Mizoram thanna leh than lohnaah mawhphurtu an ni satliah lova, a innghahna lungphum pawimawh tak an ni tih inhre reng turin a chah a ni.

Minister chuan Revenue Department hnuaia officerte chu tum (target) neia thawk turin a chah a, hunbi tiam neia hmachhawp siam tura chahin a tul anga vil reng an tum thu a sawi bawk a ni. Sawrkarin dan kaltlanga mawhphurhna a pekte chu phurrita ngai lo tura chahin an thawh parzu mipuiten an tlan theih tura insangmar reng turin a fuih a, an hun chhunga hnuhma tha hnutchhiah tum turin a chah bawk a ni.

He workshop-ah hian thupui thlan bik neiin thil pawimawh talk tak zirhona leh sawihona hun hman a ni a. Digital India Land Records Modernisation Programme (DILRMP) chungchangah Pi Maria Lalramchuani, GIS Consultant, DILRMP chuan presentation a pe a, Lail4en Consuklting Pvt. Ltd., in e-ram chungchangah zirtirna pe in, Pu V. lalrindika, Surveyor-I, LR&SDept. Hnen atangin Generation of Unique Land Parcel Identification Number (ULPIN) zirtirna ngaihthlak a ni a. SASCI, DILRMP leh SVAMITA (Survey of Villages and Mapping with Improvised Technology in Village Areas) chungchang zirtirna Pu Remlalliana Hnamte, Under secretary, LR&S Department hnen atang ngaihthlak a ni bawk.

He Workshop hi Pu Lalhmunsanga Hnamte, Addl. Secretary, LR&S Department-in a kaihruaia, Dr. H. Lalthlangliana, Secretary, LR&S Department-in inlawmna leh fuihna thu sawiin nilengin hun an hmang a, tlai lamah Department hmalakna chi nhrang hrang thlirhona leh sawihona hun an hmang bawk a ni.