1933/2024-2025

Dated Hnahthial the 6th September, 2024: Mizoram Horticulture Department in sawhthing tam natna enkawl dan inzirtirna fehchhuah runpui a huaihawt - “Operation Ginger 2024” chu Hnahthial District-ah August ni 16, 2024 khan Tarpho khuaah neih tan a ni a. He hunah hian District Horticulture Officer Pu Lalthakima’n kaihruaiin, Pi Emelyne Lalmawipuii, Assistant Director leh Pu Lalrotawma, Senior Horticulture Demonstrator ten training an pe a. Lo neitu 21 telin sawhthing tam natna enkawl dan tur chi hrang hrang zirtirna pek an ni a. Tarpho ‘Multipurpose Farming Society’ hnenah hlo tur kahna te pek an ni bawk.

Operation Ginger hi ni nga(5) awh tura duan niin a ni khatna hi August ni 20 khan neih tan a ni a. A ni khatna ah hian Rotlang ‘E’, Tuipui ‘D’, Aithur, Leite, Khawhri, leh S.Chawngtui ah te training pek a ni. He niah hian an vaia belh khawmin lo neitu  105 an tel a ni. 

Ni hnihna hi August ni 21 khan neih niin Darzo, South Vanlaiphai, Cherhlun, New Ngharchhip leh Ngharchhip a lo neitute hnenah training hi pek an ni a. Hemi ni hian an vaiin lo neitu 147 te hnenah training pek an ni.

Ni thumna hi August ni 23 khan neih niin Muallianpui, S.Lungleng, Lungpuitlang, New Kawnpui, Thingsai leh Bualpui H a lo neitute  hnenah training pek a ni a. Training hi an vaiin lo neitu 117 te hnenah pek an ni.

Ni lina hi August ni 27 khan neih niin hemi ni hian  Chhipphir, Bualpui V, Lungmawi, Rawpui, Pangzawl leh Thiltlang a lo neitute hnenah training pek an ni a. An vaiin lo neitu 124 an tel a ni.

Ni ngana hi August ni 28, 2024 khan neih niin hemi ni hian training programme hi Hnahthial town-ah neih a ni a. Lo neitu 36 an tel a ni.

Training pekna khaw hrang hranga zirchiannaah sawhthing tam natna hluar ber chu ‘Rhizhome rot’ natna a ni a. Hei bakah hian Leaf spot, Yellow Disease leh Bacterial wilt natna te chu khaw thenkhatah hmuh chhuah a ni bawk. Buh leh thlai eichhetu rannnung khaw thenkhatah hmuh an ni bawk a. Heng thlai eichhetu rannung hluar zualte chu tho lung(Rhizome fly) leh eichhetu pangang (Shoot borer) te an ni.

‘Operation Ginger’ chu Hnahthial District –ah hlawhtling taka neih niin training hi khaw 26 a lo neitu 550-te hnenah  pek an ni. He operation hi kawng chhiat avangin S. Lunglengah neih theih a ni lova. S.Phailengah KVK, Hnahthial lamin training an lo pek ve tho avangin pek an ni lo bawk. Khaw hrang hrang a lo neitute hnenah chuan an mamawh dan ang zelin hlo tur kahna pek an ni a. Training kal zawng zawngte hi lo neitu dangte hnenah lo in zirtir chhawng tura chah an ni bawk. 

Hnahthial District chhunga sawhthing ching in report zat hi mi 1812 niin quintal 5900 vel chin nia report a ni a. A chingtu nawlpuiin quintal 5-10 lingin a tam zual deuhvin quintal 10 aia tam te an ling hlawm a ni. Hnahthial District-ah hian sawhthing chingtu intelkhawm, ‘Multipurpose Farming Society’ 35 an ding mek a ni.