1932/2024-2025

Aizawl, the 5th September, 2024: School Education Minister Dr. Vanlalthlana hovin vawiin chawhnu dar 1:00 khan Calvary Comprehensive School, TNT, Muanna Veng-ah Zirtirtute Ni lawmna hun hman a ni.

Khuallian Dr. Vanlalthlana chuan kalkhawmte Zirtirtute Ni vawi 63-na pual chibai bukin, Calvary Comprehensive School din chhoh dan leh Pu Sangthankima (Papuia) thahnemngaihna, inpekna leh hmangaihna ngahzia chu ropui a tih thu a sawi a. Zirna mai bakah taksa, rilru leh thlarau damna ngaih pawimawh a ni chu ropui a tih thu sawiin, naupang taksa that nana infiamna leh thiam thil bik nei tura vocational education kalpui a nih bakah hnam hmangaihna rilru tuh nana Mizo culture inzirtirna an kalpui thin chu fakawm a tih thu a sawi bawk.

School Education Minister chuan Calvary Comprehensive School-ah Elementary atanga High School thleng zirna kalpui a ni leh he zirna in atanga matric pass chhuak mi 200 dawn an awmte, University Gold Medalist hial an chhuakte chu chhuanawm a tih thu sawiin, infiamna lama State leh National level-a medal thawk chhuak thei an chher chhuakte, mi puitling tak tak leh mahni intodelh thei an chher chhuakte chu ropui a tih thu a sawi a. Rawngbawlna thinlung tak tak leh nu leh pa chan changa TNT a awm naupangte enkawla zirtirna petute hnathawh chu ropui a tih thu sawiin, a rah chhuah duhawm tak kan hmu mek zel a ni, a ti a. Zirlaite chu an zirtirtute thu awiha zah taka en thin turin a fuih a, Calvary Comprehensive School, TNT te an kalzelna turah duhsakna a hlan a ni.

He hun hi Pu F. Lalvena, Principal, Calvary Comprehensive School chuan kaihruaiin Dr. Sangthankima, TNT Founder & Padma Shree Awardee-in hunserh a hmang a, Malsawmtluanga, Class X in Teacher's Day pual thuchah a chhiar a, zirlai naupangte'n an thiam thilte entirin hun hlimawm tak an hmang a ni.

Calvary Comprehensive School hi kum 1998 ah bultan niin, Middle section bik hi kum 2000 khan  permission hmuh niin, 2002 khan MBSE affiliation tih a ni a, 2008 khan Adhoc Aided-ah hlankai a ni. High School hi kum 2009 khan permission hmuh niin, 2010 khan MBSE affiliation tih a ni.