Vawiin (July ni 20) chawhnu dar 3 khan Lawngtlai District Swachh Bharat Mision (Gramin) chu an Chairman, Lawngtlai District Bawrhsap Dr A.Muthamma hovin DC Conference Hall-ah an thu khawm.

He thut khawmah hian kum 2015-16 chhunga Swachh Bharat Mission (Gramin) hnuaia hna thawh dan tlangpui thlir ho niin, sawrkar kum kal mek (2016-17) chhunga hma lak dan tur hrang hrang rel a ni a. Kum tharah hmasawnna duhawm zawk a awm ngei theih nan theihtawp chhuaha hma lak tum a ni.

Lawngtlai District SBM (G) chuan district chhunga khaw tin chu zun leh ek thlahdah awm lohna khua (open defecation free village)-a siam vek turin awmze nei taka hma lak an rel a. Mipui zingah a zau thei ang bera inzirtirna tha theh darh turin sawrkar department leh NGO hrang hrang thawh ho ni se tiin, bawh bik lam neia a tahtawl zela hma lak ni se, an ti. Hemi atan hian uluk taka hma lak dan tur duang a, hna thawh dan en zui turin block level commitee din ni se, tih a ni bawk.

Lawngtlai District Swachh Bharat Mision (Gramin) hnuaiah hian kum 2015-16 chhung khan khaw 16-ah ek in 767 sak a ni a. Kum 2016-17 chhung hian ek in 4000 aia tlem lo sak hman tum niin, ek in 489 chu sak tan tawh a ni a. He'ng zinga 57 chu sak zawh tawh niin, sak lai mek 432 a awm bawk.

Sawrkar laipui ruahman ang chuan kum 2019, October ni 2 hma ngeiin in tin tan inthiarna tha leh thianghlim siamsak vek tur a ni a. Chumi atan chuan Public Health Engineering Department hnuaiah Swachh Bharat Mission (Gramin) kalpui niin, hemi atang hian thingtlang khuaa in tin tan individual household latrine (IHHL) saksak vek tur a ni.

Vawiin thut khawmah hian Fisheries Minister Dr BD Chakma, Tuichawng bialtu MLA leh Lawngtlai District SBM (G) Executive Vice Chairman Er H.Duhkima, PHED Lunglei WATSAN Circle-a Superintending Engineer te bakah, member dang thahnem tak an tel.