Vawiin khan Health Minister Pu Lal Thanzara hovin Health & Family Welfare Department-a hotulu leh senior officer dangte chuan a Office ah meeting an nei a. Meeting ah hian tunhnaia Indo Global Health Consortium (IGHC) te nen kawng hrang hrang a bik takin Medical College din chungchanga hmalakna kal mek zelah he pawl nen a inbiakna neih mek leh hmalak tum dante thlirho in an sawiho a ni.
Chief Minister leh Health Minister hmalakna in Medical College changtlung tak neih anih theih nan Indo Global Health Consortium (IGHC) te nen inbiakna neih mek a ni a. Indo Global Health Consortium Team te hi Mizoramah tum hnih rawn kal tawhin, Mizoram Health Department Team te pawh Health Commissioner hovin July ni 6 leh July ni 9 chhung khan Delhi-ah IGHC ten nen khunkhan takin sawihona an nei leh a. IGHC te nen hian Falkawn-a Medical College changtlung, foreign faculty leh students te hip thei din dan turte, Cancer Hospital thuam that dan tur te leh Mizorama nurse zir zo te’n ramdanga hna an hmuh theih dan turte sawi hovin, he lamah hian hma lak chhoh zel an tum a ni. Canadian Team te hi August 2016 chhunga Mizoram Sorkar nen thawhhona thuthlung MoU ziak hman ngei tura rawn zin an tum bawk.
Indo Global Health Consortium te hi Canada, UK leh India a hriselna lama hma la tura pawl hrang hrang in telkhawm an ni a, Toronto (Canada), Walford (UK) leh New Delhi (India) ah hmunpui nei an ni a. Chief Minister hmalakna avanga Mizorama Health Department ti changtlung tura rawn kal an ni.
Medical College neih theih nan July 2016 khan Ministry of Health & Family Welfare ah application pawh thehluh leh ani a. 2016 tawp lama Medical Council of India (MCI) atanga Inspection Team lokal turte hmachhawn turin chak taka hmalak zel a ni.
