1876/2026-2027

Lawngtlai, 20th August  2026: Vawiin khan Lawngtlai District Water & Sanitation Mission (DWSM) chuan  an Chairman leh bawrhsap nibawk Pu Donny Lalruatsanga, kaihhruaiin DC Conference Hall-ah thutkhawm an nei.

Pu Donny Lalruatsanga chuan kalkhawmte hnena lawmthu sawina a nei hmasa a. Swachh Bharat Mission (Gramin) leh Jal Jeevan Mission- kaltlanga  vantlang mipuite tana siam- Water Tanky, Solar pump, Community Sanitary Complex, Compost pit, Soak pit leh Plastic Collection Centre- te enkawl leh vawnfai kawngah mipuiten hmasawn a tul hle a ni, a ti. Bawrhsap chuan mipuite tana tui thianghlim pek kawngah te,  faina leh thianghlimna bakah tui hna humhalh leh tui khawlkhawmna kawngah chak zawka hmalak a tul tiin DWSM te theihtawp chhuah chhunzawm turin a chah nghal bawk.

Er. Lalnunfela, EE, PHE leh Member Secretary - nibawk chuan DWSM hnuaia hmalak tawhna tlangpui leh vawiina ngaihtuah tur  sawizauna a nei a.  Tui humhalhna leh ruah tui khawlkhawmna tihchak nana kalpui mek 'Jal Sanchay Jan Bhagidari: Catch the Rain' programme chu Lawngtlai District- ah pawh tha taka kalpui tura hmalak ni se an ti a. Ruah tui khawlkhawm kawngah mipuite zingah inzirtirna uar zawka kalpui ni se,  hemi atan hian LADC, CADC, VC leh NGO te nen thawhho ni se an ti a. Tui hna humhalh kawngah sawrkar department hrang hrangte nena tha zawka thawhho ni se an ti bawk a ni. Solid Waste Management Rules 2026-  in a phut anga bawlhlawh - Dry, Wet, Sanitary, leh special care - a thliarhran a tul dawn a, hemi kawngah hian District Water & Sanitation Mission kaltlanga hmalak ni se an ti bawk  a ni.

Vawiin thutkhawmah hian Lawngtlai District Water & Sanitation Mission (DWSM) Member- te an tel kim tha hle a, Pu Donny Lalruatsanga chuan lawmthu sawina neiin thutkhawm a khar.