Lawngtlai East bialtu MLA Pu H. Biakzaua chuan tukin zing khan Lawngtlaia police quarters-te tlawhin, a dinhmun a enfiah.

MLA Pu H. Biakzaua hi Lawngtlai-III bialtu MDC Pu T. Lalengmuana bakah, Lawngtlai-III VC leh Electric Veng VCP Pu K. Laldinmawia leh khawtlang hruaitu dangte'n ṭawiawmin, Lawngtlai SDPO Pu Robert S. Beihrosa MPS, Lawngtlai Police Station OC Pu JH Sanghmingthanga leh thawktu dangte'n an lo dawngsawng a. Lawngtlai Police Station complex-a quarters-te lo fan kualpuiin, a dinhmun an lo hrilhfiah a ni.

Lawngtlai East bialtu MLA chuan ram leh khawtlang him nana chhun zan zawma rim taka hna thawktute chenna atana sawrkarin quarters a pek Lawngtlaia mi chu a hluia a chhiat lutuk tawh avangin luah zel tlak nia a hriat loh thu a sawi a. Furpui lai phei chuan awmna tlak a nih loh avangin a theih anga ranga quarters ṭha zawk sak a nih theih nan Home Minister sawipui thuai a tum thu a sawi.

Lawngtlai Police Station huam chhunga building 30 awmah pathum chu sak ṭhat ngai lova ngaih niin, he'ng pathum zinga pahnih chu repair ngai tura ngaih a ni a. A bak quarters 25 chu sak ṭhat ngai vek tura ngaih a ni.

Lawngtlai Police Station-a quarters sak ṭhat ngaia ngaihte hi assam type building vek niin, kum 1978-a sak an ni deuh vek a. Building pahnih phei chu luah ngam a nih tawh loh avangin ṭhiah a ni tawh nghe nghe a ni.