Lawngtlai Horticulture Division leh Lawngtlai Florist Association tang kawp buatsaiha LADC Conference Hall-a Lawngtlai Horticulture Exhibition 2017 neih chu vawiin khan khar a ni.
He huna Khuallian, LADC-a Executive Member i/c Horticulture Pu C.Sangchhunga chuan exhibition buatsaihin kawng tam taka rilru thar a puttir thu leh hma lam hun zelah pawh lian leh huam zau zawka buatsaih zel a nih a beisei thu a sawi a. Mi thawkrimte thawh rimna rah lang chhuak chu hlawhtling tura tih tak takna leh taihmakna pawimawhzia te, intodelh nana kut hna thawh uar a pawimawhzia te lantirtu ni se, a duh thu a sawi. Thu a sawi zawh hian Khuallian hian lawmman a sem nghal.
Lawngtlai Divisional Horticulture Officer Pu L.Lalhmingmawia Pachuau pawhin exhibition buatsaih chu ram leh mipuiin hma kan sawnna lantirtu a nih bakah, thil pho chhuahte chu mi dangte fuih thara cho phutu a nih thin thu a sawi a. Exhibition en dik nana tehfung hrang hrangte a sawi fiah bawk.
He exhibition kharna hun hi Horticulture Development Officer Pu Hunlawmawma'n a kaihruai a. Nl Esther Lalduhawmi Hrahsel chuan kal khawmte zaia awiin, Lawngtlai Florist Association Secretary Pi Sharon Khualchhawn chuan lawm thu a sawi.
Lawngtlai Horticulture Exhibition 2017 hi Lawngtlaia tum khat buatsaihna niin, April ni 27, 2017 chawhma dar 11 khan hawn a ni a. Item chi hrang 29 pho chhuah niin, pangpar lam chi a tam ber a; thil entir zawng zawng hi a mal chhiarin 379 a ni. Exhibition neih chhung hian mi 5000-6000 velin he exhibition hi tlawhin, mi 78-in visitor's note-ah exhibition an hmuh dan leh rawtna te an ziak a. Thil pho chhuah hi Rs 90,000/- hu vel hralh chhuah a ni. Lawmman mal 121 siam niin, lawmman atan hian Rs 71,900/- sen a ni a. Thil pho chhuah hmuhnawm ber "queen of the show" atan Pi Lalchhawnsangi, College Veng chu thlan a ni.
