Vawiin khan Lawngtlai Town Beautification Committee chu Lawngtlai Bawrhsap Dr Arun T., IAS hovin DC Conference Hall-ah an thu khawm a. Lawngtlai khawpui a lo mawi a, a lo felfai zawk theihna tur kawng hrang hrang an sawi ho.

He thut khawmah hian LADC CEM ai awhin Executive Member Pu H. Chhuanawma bakah state sawrkar leh LADC hnuaia officer pawimawh tak tak te, tlawmngai pawl hrang hrang ai awh leh cable TV operator te an tel a. Lawngtlai khawpuiin faina leh thianghlimna kawnga harsatna a tawh hrang hrangte sawi hovin, a chin fel dan tur leh Lawngtlai khawpui chei mawi tura hma lakna tur rawtna te siam a ni.

Lawngtlai khawpui a lo mawina tur chuan mi tinin faina ngaih pawimawh a, veng tinin mahni veng vawn fai a pawimawh thu tarlan a ni a. Khawlai dunga electric, telephone leh TV hrui inzam hnawk tam lutuk chu a zamtute’n en fiah a, hrui tangkai lo paih leh a tul ang angte pawh felfai zawka zam a nih theih nan hma lak ni se, tih a ni a. Khawpui chhung leh dai vela thuziak (hoarding/banner) tar hlui tawh lutuk leh chhe tawhte chu a tartute’n chei tha tur emaw la kiang tur emawin ngenna leh hriattirna chhuah a ni dawn a, November ni 17, 2017 hmaa eng mah hma lakna a awm loh chuan DC office lam atangin a then fai hna thawh a ni ang.

Kawngpui a tlo zawk nan leh khawpui hmel a mawi zawk nan, tuiluankawr te pawh uluk taka enkawl a tul thu sawi ho niin, hemi atan hian mahni huam chhunga tuiluankawr bawlhhlawhin a hnawhte tifai turin khawtlang hruaitute ngen ni se, tih a ni a. Chuti anga hnatlang thei khawtlang emaw tlawmngai pawl emaw an awm a nih chuan DC office-a NULM Cell atangin an thingpui inna tur emaw sih chhhuah theih a nih thu pawh tarlan a ni a. Khawpui chhunga he’ng tuiluankawrte hi a khuhna siam vek a nih theih nan hma lak tum a ni bawk.

Khawpui hmelhmang thlak nan motor tlan dan leh hun dan felfai zawk LADC-a Transport Department leh DTO leh Police lamin an ruahman tawh sa chu chak zawka bawhzui ni se, tih a ni a. Hemi kawngah hian mipuite paw’n mahni duhna lai laia lirthei hung mai lo tur leh motor dahna garage tha tak nei vek turin committee chuan a ngen a ni.

Khawlaia ran tla chhuak a awm loh nan District Magistrate lam atangin CrPC section 144-na tlawh chhana thu pek chhuah tum a ni a. Hemi hi mipuite’n an zawm ngei theih nan khauh taka bawhzui tum a ni bawk.

He thut khawmah hian Lawngtlai khawpui chei mawi nan kawng peng thuam remchang laia thing emaw pangpar emaw phun te, khawlai dunga kopang dawlna lung banga hnam ziarang pho lang thei lem ziak leh faina lama mipui zirtirna tar te, TV, chanchinbu leh social media kal tlanga inzirtirna a tam thei ang ber tihchhuah te pawh rel a ni a. Faina kawnga chawl lova hma lakna a kal chhoh zel theih nan veng chhung vawn fai kawnga YLA Branch te inelna thla thum dan zel emawa buatsaih tum niin, a tum khatna atan December ni 15, 2017 hi ruahman chhin a ni a. Hemi chhung hian faina kaihhnawiha YLA Branch thawk tha ber thlang chhuakin, lawmman tha tawk tak siam tum a ni.

Faina kawnga ke penna langsar takah October ni 27, 2017 khan Lawngtlai Bawrhsap chuan preliminary notification chhuahin, Lawngtlai khawpui chu inthiarna mumal nei lo awm lohna (open defecation free)-ah a puang tawh a. November ni 11, 2017 thleng hian sawiselna hun hawn niin, hemi chhunga a rem lohna sawi thei an awm loh chuan final notification chhuahin Lawngtlai khawpui chu odf-a puan hlen tawh tur a ni. Hemi bakah hian vantlang inthiarna pawh khawpui chhung hmun thumah ruahman niin, a sak hna kalpui chhoh mek a ni bawk.