Vawiin khan Lawngtlai District Disaster Mangement Committee chu an Chairman Bawrhsap Dr Arun T., IAS hovin Lawngtlai DC Conference Hall-ah an thu khawm a. Chhiat rupna laka inven dan tur leh rikrum thila hma lak dan tur hrang hrang an sawi ho.

Hun kaihruaitu Bawrhsap chuan Lawngtlai chu lei min hlauhawmna hmuna awm a nih avangin chhiatna thleng thei laka lo inven leh lo inhmakhua lawk a tul thu sawiin, District Disaster Management Committee paw’n chumi lam hawia chak taka hma lak a pawimawh tih a sawi a. District Disaster Management Authority-in tun hnaia hma lakna thar leh ruahmanna a neihte sawiin, committee member-te chu thurawn pe tur leh tha taka thawk ho turin a sawm nghal a. Sawi hona hun hman zui nghal a ni.

Disaster management lama Lawngtlai District hma lakna thar langsar zualah chuan chhiatna a thlena rang taka hma lak a nih theih nan leh thuneitu lamte hriattir vat a nih theih nan Lawngtlai District tan a thlawna biak pawh theihna tur (toll free no) siam a ni a. 1077-ah hian eng lai pawhin zualko theih a ni. Disaster Response Vehicle thar ruahman a nih bakah, DM&R hnuaiah tanpuina hna thawhna kawnga hmanraw pawimawh tur eng emaw zat lei belh a ni a. Chhiatna thlen thulha hma lak dan tur ruahmanna (Lawngtlai District Disaster Mangement Plan) pawh tha zawka siam leh tihchangtlun tum a ni bawk.

Mipuite’n chhiat rupna a lo thlena lo hmachhawn dan tur an thiam theih nan Lawngtlai District-a a tum khatna turin tih chhinna ‘Mega Mock Drill’ buatsaih tum a ni a. A hunah November ni 14 leh 15, 2017 ruat niin, National Disaster Response Force atangin team lo kalin, anni ho hian chhiat rupna a thlen thulha chi-ai lova lo hmachhawn dan tur inzirtirna leh tih chhinna neih a ni dawn a. Hemi huna department hrang hrang mawhphurhna tur te pawh vawiin hian sawi nghal a ni.