No.5514/2020-2021

Lawngtlai, Mimkut thla ni 28, 2020: Lawngtlai Town Sanitation Task Force chu vawiin khan Lawngtlai DC Conference Hall-ah an Chairman, Lawngtlai Bawrhsap Dr Andrew H. Vanlaldika, MCS hovin an thu khawm a. Faina Hapta (Cleanliness Week) 2020 hman dan tur leh khawpui fai inelna atana inbuatsaih dan tur an rel.

Meeting kaihruaitu Bawrhsap chuan faina leh thianghlimna chu hmasawnna tehfung pawimawh ber pakhat a nih thu sawiin, sawrkar pawhin a ngai pawimawh a, inelna hrang hrang a kalpui reng tih a sawi a. Faina kawnga Lawngtlai District-in hma a sawn zel theih nana ngaihtuahna seng turin member kal khawmte chu a chah a ni.

Urban Development & Poverty Alleviation (UD&PA), Lawngtlai District-a District Programme Officer/SDO (Sadar) Pu V. Lalruatliana, MCS chuan kum hmasa lama Faina Hapta hman dan leh hemi puala fai inelna buatsaih dan bakah, kumina hman dan tura state atanga kaihhruaina duan sa te a sawi fiah a. Member-te atangin rawtna hrang hrang ngaihthlak niin, hma lak dan tur te sawi ho zui a ni.

Kumin Faina Hapta hawnna hun chu October ni 2, 2020 (Zirtawpni) zing dar 7-ah Lawngtlai Bazar Venga Areopagy hmunah hman ni se, tih a ni a. Faina hapta chhung hian faina kawnga intihsiakna leh inzirtirna hrang hrang kalpui tum a ni a, intihsiakna hi thuang hrang hrang - veng fai, zirna in fai, office fai, hotel/restaurant fai-ah te buatsaih tum a ni a. A hapta bik hi chu October ni 9 thleng ni mah se, a kharna hun erawh a hranpaa buatsaih lovin, Republic Day 2021 lawmnaah lawmman sem te nen hun hmang tura ruahman a ni.

Vawiin thut khawmah hian faina kawnga inzirtirna chu veng hrang hrangah uar zawka puanzar leh hnatlang hmang tea kalpui thin ni se, tih a ni bawk.