Vawiin khan Lawngtlai DC Conference Hall-ah Lawngtlai Town Sanitation Task Force chu an Chairman, Lawngtlai Bawrhsap Dr Arun T., IAS hovin an thu khawm a. Mizoram khawpui fai inelnaa Lawngtlai khawpui a tel ve dan tur leh hma lak dan tur hrang hrangte an sawi ho. 

Meeting kaihruaitu Lawngtlai Bawrhsap chuan khawpui fai inelnaa endikna tur hrang hrangte sawiin, hma lak dan tur ruahmanna a duante powerpoint presentation hmangin a entir a. Faina kawnga inelna chu a lawmman ringawt thlir tur ni lovin, mipui hrisel nan leh khawpui nuam zawk kan neih theih nana a pawimawhna hriat tel a tul a ni, a ti a. Khawpui fai lawmman dawng thei turin chhungkaw tinin inthiarna in an neih te, bawlhhlawh thliar hran leh sawngbawl dan tha ruahman te, khawpui chhung bawlhhlawh then fai hnatlang thawh te leh mipui zirtirna a zau thei ang bera puanzar te chu thil tul hmasa a nih thu a sawi.  

Khawpui fai lawmman dawng thei tur hian inbuatsaihna kalpui mek a ni a. Lawngtlai khawpui chu ODF-a puan a nih theih nan khawpui chhunga ek in nei lo chhungkaw 351 zawn chhuah tawh niin, UD&PA leh MGNREGA convergence hmangin ek in saksak mek an ni a. LADC-a LAD lam paw’n khawtlang then fai hnatlang nei tura VC zawng zawng hriattir turin ruahmanna siam a ni.

He meeting-ah hian kumin October ni 2-9 chhunga Faina Hapta (Swachh Bharat Cleanliness Week) hman dan tur rel nghal a ni a. A hawnna hi October ni 2, 2017 zing dar 7-ah Lawngtlai Bazar Venga Areopagy hmunah hman ni se, tih a ni. He hunah hian Lawngtlaia state leh LADC hnuaia officer-te, tlawmngai pawl leh sikul naupangte chu tel tura beisei an ni a. Heta kal khawmte hian bawlhhlawh chhar faiin khawlai dung an suar tluan nghal dawn a ni. 

He Faina Hapta hman chhung hian office, zirna in, veng leh hotel/restaurant/thingpui dawr fai thlan chhuah a, lawmman pek leh tum a ni a. A endik turte pawh ruat nghal niin, anni hian October ni 1-5 chhungin an endik ang. Vawiinah hian October ni 9-a Faina Hapta kharna hun hman dan tur pawh rel nghal a ni bawk. 

Faina Hapta hman tur leh Mizoram khawpui fai inelnaa lawmman dawng ngei thei turin veng tinin theih tawp chhuahin faina kawngah hma la se, tih chu Lawngtlai Town Sanitation Task Force duhdan leh mipuite a ngenna a ni.