1104//2023-2024

2023 Vawkhniahzawn thla ni 11: Kumina Mizoram State Legislative Assembly Inthlanpui buatsaih tur atan Lawngtlai District-ah inbuatsaihna kalpui mek niin, vawiin khan Lawngtlai DC Conference Hall-ah Sector Officer atana ruatte leh venhimna lam thawktute training neihpui an ni.

Lawngtlai District Election Officer Pu David Lalthantluanga chuan inthlanna felfai leh muanawm tak neih a nih theih nan te, vote neite'n kim taka vote an thlak theih nan te theih tawp chhuaha hma la turin training-a telte sawmin, an tih tura duante ṭha taka hlen chhuak turin a chah a ni.

Lawngtlai District-ah hian Assembly bial pathum awmin, 36-Tuichawng bialah polling station 70, 37-Lawngtlai West bialah polling station 69 leh 38-Lawngtlai East bialah polling station 42, a zavaiin polling station 181 a awm a. He'ng polling station-te hi sector 29-ah ṭhenin, sector officer-te'n an vil dawn a. Sector officer 29 ruat an nih bakah, thla veng atan mi panga ruat an ni.

Vawiina sector officer leh venhimna lam thawktute tana training buatsaihah hian Additional Deputy Commissioner Pu Abraham Beirazi Khithie leh Election Officer Pu Denny Lalchhuanawma te'n hriat tur pawimawhte an sawi a. Hriat fiah loh leh hriat thiam loh awmte sawi hova inhrilhfiahna hun hman a ni.