No.1130/2021-2022

Lawngtlai, Nikir thla ni 25, 2021: Vawiin khan Lawngtlai District Bawrhsap, District Education Committee Chairman ni bawk Dr Andrew H. Vanlaldika hovin Lawngtlai DC Conference Hall-ah kum thum kal ta chhunga High School Leaving Certificate (HSLC) leh Higher Secondary School Leaving Certificate (HSSLC) examination-a Lawngtlai District chhunga sikul hrang hrang result thlir ho a ni.

He hunah hian Lawngtlai District Education Department lam hotute leh Lawngtlai khawpui chhunga high school leh higher secondary school hrang hrang Principal/Headmaster leh zirtirtute bakah, Lai Students' Association (LSA), Central Young Lai Association (CYLA) leh Lai Women's Association (LWA) ai awhte an kal khawm a. Kum thum kal ta chhunga HSLC leh HSSLC exam-a Lawngtlai District result an thlir ho rualin, sikul leh zirlaite harsatna hrang hrang te, zirna tibuai leh tibahlah thei nia an hriat te leh a sut kian dan tur te, Lawngtlai District-a zirnain hma a sawn theihna tur leh HSLC leh HSSLC result tha zawk neih theihna tura rawtna hrang hrang te an sawi ho a ni.

Bawrhsap Dr Andrew H. Vanlaldika chuan thil eng kimah zirna chu a bul thuta pawimawh ber pakhat a nih zel avangin ngaih pawimawh a, chawi san zel a tul a ni, a ti a. Zirna kawng leh hna zawnna kawngah pawh a ti tha zinga Lawngtlai District a lan zel theih nan District chhunga zirna chu tihchangtlun a, tan lak a tul tih sawiin, zirtirtute leh Education Department chu nasa zawka tan la a, pheikhai rual taka ke pen turin a chah a. Ram leh hnam humhalh tur pawhin zirna bawk chu a bul thuta pawimawh hmasa a nih thu sawiin, zirlai pawl leh tlawmngai pawl te pawh tha thlah lova zirna chawi san kawnga hma la zel turin a chah bawk.

Kal khawmte chuan kum 2019 atanga kum 2021 thleng (kum thum chhung) result enin, kum tin hma sawn zawnga Lawngtlai District a kal chu lawmawm an tih thu sawiin, hma sawn zel turin tha thlah lova tan lak sauh sauh a tul an tih thu an sawi a. HSLC leh HSSLC-a result tha nei turin pawl hniam zawk (elementary level) atanga zirna uluk a pawimawh an tih thu an sawi bawk.

HSLC-a Lawngtlai District chhunga zirlai pass percentage chu - kum 2019-ah 49%, kum 2020-ah 50.50% leh kum 2021-ah 65.07% a ni a. HSSLC-a Lawngtlai District chhunga zirlai pass percentage chu - kum 2019-ah 42.10%, kum 2020-ah 54.90% leh kum 2021-ah 68.90% a ni thung.