No.1131/2021-2022

Lunglei the 25th June 2021 – HPC Lunglei leh AH&Vety Department te tangkawp kuthnathawktute tana hmalakna ‘Goat Farming Pilot Project’ chu vawiin khan HPC Lunglei Office-ah Vice Chairman Pu Lawmawma Tochhawng in a tlangzarh.

He pilot project bultanna atan hian beneficiary pathum – Pu Lalhminga, Bazar Veng Lunglei, Pi Lalbiaksangi, Zobawk leh Pu C.Lalrinmawia Electric Veng Lunglei te thlanchhuah niin vawiin khan kel panga (5) theuh an dawng a. Hemi bakah hian a insakna leh enkawlna senso atana cheng sing li (Rs. 40,000/-) theuh an lo dawng tawh bawk a ni.

Tlangzarhna inkhawm Pu Vanlalmuana, Chief Planning Officer HPC Lunglei kaihhruaiah Pu Lawmawma Tochhawng chuan hmasawnna daih rei kan neihna tur leh ram leh hnam hmasawn zelna turin ei leh bara kan intodelh a pawimawh hmasa ber a ni tiin ei leh bara kan intodelh theihna turin HPC Lunglei chuan theihtawp a chhuah zel dawn a, kan kutkawih ngeia kan thar leh siam chhuah, project tha leh tlo kalpuia mipui tam zawkte tana eizawnna ngelnghet siam sak hi kan tum ber a ni, a ti. Goat Farming beneficiary te duhsakna hlanin taima taka hmathlir thui tak neia hma la tura fuihin AH&Vety Department mithiamte rawn thin turin a chah a ni.

‘Goat Farming Pilot Project’ hi Lunglei District chhungah zau zawka la kalpui zel tum a ni. HPC Lunglei hmalakna peng pakhat entrepreneurship lama intihsiakna ‘Leitlangpui Rahbi 2019’ hnuaia lawmman dawngtute zinga pakhat Pu Sangkhuma Khiangte, Upper Lungrang S chuan kel vulh hi hlawhtling taka kalpui mekin tun dinhmunah kel 70 chuang a nei mek a ni.