No.1129/2021-2022

Kolasib dated 25th June 2021: Vawiin khan Pu K. Lalrinliana Minister of State for Food Civil Supplies and Consumer Affairs Department chuan a bial Kolasib Assembly Constituency chhung a Chemlui, Zukmawi WRC Area-a kawng siam mek te chu a hmun ah a enfiah. He kawng siam mek hi PMGSY Scheme hnuaia loneitute leh sangha dil hmanga eizawngte’n hlawh zawk leh chak zawk a an huan-thlai tharte an seng a, a tihralna hmun tur an thlenpui zung zung theih nana ruahman a ni a. Rengtekawn atanga Builum thleng Cement Flooring tur a ni. Tun dinhmunah kawng siam zawh tawh hi Km 3 leh meter 840 niin PCC chhun a ni a, tui hawk luan kawr a tel bawk a ni.

Minister Pu K.Lalrinliana chuan loneitute’n a hma lama he kawng hi an chhawr vat theih nan chak zawk a kawng siam a tulzia sawiin, kawng siam a hnathawk mek te fuihin hna tha tak a kalpui turin leh hunbi ngai pawimawh turin a chah bawk a ni. Kumin September thla chhunga zawh hman beisei niin kawng hi Km 13.52 a thui siam tur a ni.

Pu K. Lalrinliana chuan Chemlui, Zukmawi Zaua loneitute leh sangha khawitute nen harsatna an tawh hrang hrangte an sawi ho a. Loneituten an harsatna hrang hrang an thlen zing a hnathawhna bungrua lak luh leh thlai thar sengna kawnga harsatna awm thin chu he PMGSY hnuaia kawng siam hian kawng tam takin a sutkian ngei a beisei thu a sawi a. Fur leh thal ah pawh loneitute’n lirthei leh hnathawhna khawl awlsawm taka an khalh luh theih a hlawk zawk leh eizawnna tlak a an lote an hman chhoh zel a rin thu sawi a. Chemlui Zukmawi Zau hruaitute hnenah Minister chuan MLA fund atangin lei dawh hna kalpui nan Cheng nuaikhat (1,00,000) a hlan nghal bawk.

Minister hi Pu C. Lalthlamuana, District Agriculture Officer leh Pu H.P. Zothankhuma, E.E., PWD-ten an tawiawm a ni.

Vawiin vek hian, Pu K. Lalrinliana chuan DC Circuit House-ah a tul apianga hman atan a lirthei a dah te enkawl chhunzawm nan Joint Village Council hruaitute hnenah cheng 15,000 a hlan bawk a ni.

Rengtekawn to Builum PMGSY Road 13.52 Km hi thuang 4 ah then niin a vai a estimate hi nuai 2059.06 a ni a, hna hi September 2018 a thawh tan a ni. PCC flooring leh Side drain siam hna hi September 2021 chhung a zo tur a beisei a ni.