No.2735/2021-2022


Khuangchawi thla ni 26, 2021: Lawngtlai Bawrhsap Dr Andrew H. Vanlaldika chuan vawiin khan a office chamber-ah Lawngtlaia Police leh Excise hotute kawmin, Lawngtlai khawpui chhunga ruihtheihthil dona kawnga hma lak dan tur a sawipui.

Bawrhsap Dr Andrew H. Vanlaldika chuan Police leh Excise te'n District chhung ralmuan nan leh thianghlim nana an hna thawh chu lawmawm a tih thu sawiin, thawktu indaih lo chung pawha tha taka hna an thawk thei chu a fak a. Lawngtlaia ruihtheihthil dona kawnga an hma laknaah theih tawp chhuah zel tura fuih tharin, ruihtheihthil - damdawi leh zu tirem tura hma lak dan tura a duh dante a sawipui a ni.

He hunah hian Lawngtlai Police leh Excise hotute chuan an hma lak dan report an pe a. Theih tawp chhuaha hma an lak chhunzawm zel tur thu an sawi a ni.

Lawngtlai Police chuan October ni 5, 2021 khan an thu dawn bawhzuiin, Lawngtlai Chandmary venga khawsa mi pahnih hnen atangin heroin no. 4 hawng 8 an man a. Lawngtlai Police Station-ah ND&PS case ziah luh nghal a ni. An damdawi man hi a market value Rs nuai 4 vel nia rin a ni a. Police hotute chuan, a neitute hi Champhai lam mi leh Pangkhuaa mi, Lawngtlai Chandmary-a mi in luaha awm an nih thu an sawi.

Attachment

  • Loading attachment...