835/2023-2024

2023 Nikir thla ni 16: Vawiin khan Samagra Shiksha, Lawngtlai District leh Science Teachers' Association Mizoram (STAM) te ṭang kawp huaihawtin LADC Conference Hall, Lawngtlaiah District Level Children's Science Congress (CSC), 2023 Sensitisation Workshop buatsaih a ni.

He hun hi Samagra Shiksha, Lawngtlai District-a Additional District Project Coordinator Pu H. Lalṭanpuia chuan a kaihruai a. Lawngtlai District Education Officer, Samagra Shiksha District Project Coordinator ni bawk Pi R. Lalnunthari chuan kal khawmte lawmna thu leh zirlaite fuihna thu a sawi a. CSC Academic Coordinator Pi Rebeck Lalrinpuii chuan hun buatsaih chhan a sawi fiah a. Resource person, Indian Institute of Technology (IIT), Gandhinagar-a Department of Physics-a Assistant Professor Dr Krista Roluahpuia Khiangte chuan kum 2023 CSC atana thupui (focal theme), "Understanding Ecosystem for Health and Wellbeing" tih hmangin zirtirna a pe a. Zawhna leh chhanna leh sawi hona hun hman a ni bawk.

He hunah hian Lawngtlai District chhunga middle school, high school leh higher secondary school sawmhnih leh pahnih (22) aṭangin zirlai (child scientist) leh guide teacher te an kal khawm a. Sub-theme beh chhana project title thlan dan te, project kalpui dan tur step hrang hrang te, presention tih dan tur te, project kalpui laia hriat tur pawimawh leh thil pawimawh hrang hrang zir ho a ni.

Children's Science Congress hi ram pum huap science communication programme niin, National Council for Science and Technology Communication (NCSTC), Department of Science and Technology, Government of India hnuaia programme kum tina buatsaih ṭhin a ni a. He programme-a tel tur hian State Level Children's Science Congress kal tlangin state tinah child scientist an thlang chhuak ṭhin a; state level-a tel tur hian district tin aṭangin inelna programme District Level Children's Science Congress chu buatsaih ṭhin a ni. He programme hi Mizoramah chuan Samagra Shiksha leh Science Teachers' Association Mizoram (STAM) te ṭang kawpin an buatsaih ṭhin a ni.

CSC hi naupang kum 10-17 te scientific method hmanga an thiam thil leh theihna hai chhuah tumna programme a ni a. A bik takin kan chhehvel khawtlanga harsatna hrang hrang thleng ṭhinte science method hmanga sut kian dan ngaihtuah chhuah thiamna naupangte neihtir hi he programme thil tum pawimawh tak a ni.

Kumin CSC thupui (focal theme) chu "Understanding Ecosystem for Health and Wellbeing" tih niin, hemi hnuaiah hian sub-theme panga (5) - Know your Ecosystem; Fostering Health, Nutrition and Wellbeing; Social and Cultural Practice for Ecosystem and Health; Ecosystem Based Approach (EBA) for Self-reliance leh Technological Innovation for Ecosystem and Health tih te a awm leh a. He'ng sub-theme panga zinga an duh ber beh chhanin zirlaite'n project an siam ang a, chu project hmang chuan District Level CSC-ah chart presentation hmangin team dangte nen inelna an nei dawn a ni. Team khatah hian naupang (child scientist) pahnih leh zirtirtu (guide teacher) pakhat zel an awm dawn a. School pakhat aṭangin team pakhat aia tam pawh a tel theih a ni.