834/2023-2024

Tukin (June 16,2023)  zing karah khan School Education Minister Pu Lalchhandama Ralte chuan District tina sorkar School te tana thawn chhuah Smartboard phurtu motor lian te chu Aizawl Vanapa hall kawtah a vailiam.

Sorkar hnuaia High School leh Higher Secondary School te hman tur Interactive Smartboard thawn chhuahna inkhawm tawi Aizawl Vanapa Hall kawta neihah hian thusawiin School Education Minister chuan world class education kan neih theihna atana hmanraw pawimawh sem chhuah a ni ta chu lawmawm a tih thu a sawi a. Sorkar hian zirtirtute chu hmanraw țha pek a, kan naupangte tan zirna țha pek hi a ngai pawimawh a, sum harsatna karah pawh sorkarin zirna a ngaih pawimawhzia a tarlang hle a ni a ti.

Minister chuan zirtirtuten hmanraw țha an neih chu hmang țangkai se a duh tih sawiin  zirtirtute tan  hmanraw thar lo chhuak te chu hmang țangkai  thei tura in chher hriam ve zel a  țul thu a sawi bawk. Minister chuan heng hmanraw țha te hi zirtirtuten in lama kawl mai chi a ni lova,  naupangten an hlawkpui ngei tur zirna atana hmang țangkai turin a chah a, he hmanrua dawngtu school te chu internet leh an mamawh sum leh pai thlenga umzui tum an nih thu a sawi bawk.

Pu Lalhmachhuana State Project Director chuan Smartboard thawn chhuah tur Gem kaltlanga lei a nih thu leh hmantlak ngei tura țha lei a nih dan te a sawi a, he hmanrua hmang hian teacher-te kut tihchakin a awm dawn a, naupangin an zir chhuah tur thiamna an puak chhuah tam theihna tur hmanrua a ni dawn a ni a ti bawk.

Interactive Smartboard thawnchhuahna hun Vanapa hall kawta neih hi Dr Lalzirmawia Chhangte Secretary School Education-in a kaihruai a, State Project Office-a Samagra Shiksha Officer-te, Aizawl khawpui chhunga Headmaster leh zirtirtu thenkhatte an tel a ni.