833/2023-2024

Vawiin (June 16,2023)  khan MRB Head Office Conference Hall, MINECO-ah Samagra Shiksha  Mizoram leh Institute of Advanced Studies in Education (IASE) ten inkawpa research project an neih “A Study on Vocational Interest of Secondary and Higher Secondary School Students in Mizoram” tih chu Dr. Lalzirmawia Chhangte, IAS, Secretary, School Education Department-in a tlangzarh a, Govt. Primary School zirtirtute hnenah Samagra Shiksha-in zirtirna kawnga hman tura a pek tablet sem chhuah a ni bawk.

Dr Lalzirmawia Chhangte chuan he hunah hian thusawiin classroom teaching atana tablet pek chhuah te hmang tangkai turin zirtirtu kalkhawmte a chah a, khawvel hmasawn zelah thil thar a lo chhuak zel a, kan zirnain ken tel a ngah sawt hle a, zirlaite mamawh phuhru tura zirtirtute pawh intuai thar a ngai a ni a ti. Information Technology-a innghat zirna hi kan uar zel dawn avangin IT-ah tan lak a ngai hle a ni a ti a, thiamna leh hmanraw thar hman kawngah hian hmahruaitu nih theih loh pawhin um phatu nih zel a pawimawh a ni. Social media hman thiam ngawt a tawk lova, zirtir nana IT hman thiam hi a pawimawh ta hle a ni a ti.

Secretary chuan India rama zirna tehna Performance Grading Index-ah kan state dinhmun a chhuanawm rih lo tih sawiin, kan chak lohna pakhat chu kan school te hi internet hman tlemna a ni a, vawiin atang chuan a theih ang angin hmanruate pawh kan inpe dawn a, internet hman tlemna state nih te, internet hman tlemna school nih te hi literacy a sang tak state nih te nen a inhmeh lova, chuvangin thawktuten tan kan lak a ngai hle a ni a ti. Secretary chuan naupangte hlawhtlin leh hlawhchhamah hian zirtirtuten mawh phurh ngam a ngai a, naupangte an hlawhchham hian an hlawhchham tih an inhriat a ngai a ni a ti bawk.

Pu Lalhmachhuana, State Project Director, Samagra Shiksha chuan keynote address sawiin, NEP 2020 hian zirlaiten an hriat leh thiam tur an paw chhuak em tih hi a ngai pawimawh a, hemi atan hian zirna hmanrua sorkarin a ngaihtuah a ni a ti. Prof.LallianzualiFanai, Principal, IASE leh Principal Investigator chuan research report a pe a. He research-ah hian Mizorama secondary leh higher secondary zirlaiten an hnathawh chak leh tuipui zawng  zir chianna neih a ni a,  district hrang hrang atangin naupang 2128-ah zir chianna neih a ni a. He zirchianna atanga a landanin Mizoram chhunga zirlaite hian tui zawng hrang hrang neiin district a zira an tuizawng danglamnate a lang a. Hmeichhia leh mipa tuizawng leh nu leh pa lehkha zirsan zawng a zira a danglamnate pawh langin zirtirna pek kawngah pawh he zirchianna hian tangkaina nasa tak a neih beisei a ni.

He hun vekah hian research project thar, “Identification of Learning Problems of Secondary School Students in Mizoram” atan Mizoram Samagra Shiksha leh IASE ten thawhdunna thar an ziak leh nghal a ni.

Research report tlangzarh leh Tablet sem inkhawmah hian School Education Department-a officer te, Samagra Shiksha officer te leh Aizawl khawpui chhunga tablet dawng tur Primary School zirtirtute an kalkhawm a ni.