832/2023-2024

Aizawl the 16th June 2023: 'Working Committee on Ruihhlo Do' chuan vawiin khan Mizoram State Veterinary Council Conference Hall Khatla-ah Social Welfare and Tribal Affairs Minister, Working Committee on Ruihhlo Do Chairman ni bawk Er. Lalrinawma hovin an thukhawm.

He huna kaihruaitu Er. Lalrinawma chuan member hrang hrang ten ruihhlo dona kawnga an thawhrimna leh inpekna chu ropui tiin, theihtawp chhuah zel a tul thu a sawi. Ruihhlo leh a kaihhnawih harsatna chuan Mizoram a run nasa hle a, Ruihhlo hmansual leh dan lova tawlhruk chuan mimal leh khawtlang nun tichhiain, hmasawnna kawng hrang hrang a ti thuanawpa, pawikhawihna leh dan bawhchhiatna a thlen nasa hle a ni a ti bawk.

Vawiin thutkhawm chuan Mizorama ruihhlo hluar zel dona tura Mizoram sawrkarin 'Core Committee on Ruihhlo do' a din hnena cheng vaibelchhe thum a pek hman dan leh hmalakna hrang hrangte thlir ho niin an hmachhawpte ngaituah ho nghal a ni a. Drug Demand Reduction, Supply Reduction leh Harm Reduction chungchanga Department leh NGO hrang hrang te hmalakna thlir ho a ni a, ruihhlo dona kawngah chak zawka hmalak a nih theih nan uar zawka do leh thawhhona tha neih a tul thu sawi a ni bawk. Khawpui mai bakah thingtlang lama ruihhlo hluar nasa lutuk chu a veiawm hle a ni tiiin, hmun kilkhawr ber thlenga ruihhlo hluar ta chu nasa lehzual a inhrilhhriatna (awareness) kalpui ni se tih a rel a. Action Plan zau zawk a siam tha tiin District tina khua zawng zawng ah Ruihhlo do tu tur Task Force din ni se tih a rel bawk.

‘Working Committee on Ruihhlo Do’ thutkhawmah hian SW & TA Department hotute bakah Excise & Narcotics Department, Mizoram Police, MSACS, H & FW Department, CYMA bakah MSU aiawhte an tel a ni.

Report a tarlan danin Mizoram Police chuan kumin January atanga May thla chhungin Heroin kg 26.521 an man tawh a, kum hmasa chhunga an man zat kg 49.367 nena khaikhinin kumin ah hian an man tam zawk a ni. Pseudoephedrine (meth siamna atana hman thin) 210.72 kg man tawhin, nikum lam khan kg 29.80 man a lo ni tawh bawk. Kumin chhungin Methamphetamine kg 25.38 an man tawh bawk a ni.

Excise & Narcotics Department chuan kumin January atanga June thla thleng khan Heroin kg 27.751 an man tawh a, Ganga kg 15.305 man tawhin Methamphatamine kg 4.056 an lo man tawh a ni.

Central YMA pawhin nikum September ni 9 atang khan heroin hawng 1696 an lo man tawh bawk a ni.