831/2023-2024

Mamit 16th June, 2023 : Vawiin khan DC Conference Hall, Mamit-ah Pu V.L. Remliana, Mamit District Bawrhsap hovin District Consultative Committee/ District Level Review Committee / District Level Security Committee thutkhawm a ni a. March Quarter chhunga Mamit District chhunga Bank hrang hrangte hnathawh dan thlirho a ni.

Meeting-ah hian Social Security Schemes hrang hrang tarlan niin pawisa chawi awm lo (0 balance) a Account hawnna Pradhan Mantri Jan Dhan Yojana (PMJDY)-ah Mipa Account nei 14268 awmin hmeichhia 18211, an vaiin 32479 an awm mek a. Pradhan Mantri Jeevan Jyoti Bima Yojana (PMJJBY) hnuaiah Enrolment 12193 awmin PMJJBY hi kumtin Insurance Premium Rs. 436/- chawia in-register theih a ni a. Kumtin May leh June thla-ah renew zel niin renew-na tur pawisa hi Account-ah a awm ngei ngei a ngai a, inngaihnathiamna a awm thei lo a ni. He Scheme-a in-register te chu eng natna vang pawha an thihin an thih hnuah an Nominee te'n Cheng Nuai 2 thleng an dawn theihna Scheme a ni. Pradhan Mantri Suraksha Bima Yojana (PMSBY) hnuaiah Enrolment 46789 awm mekin kumtin Rs. 20/- chawia in-register theih a ni a. PMSBY hi Accidental Insurance niin Accident thil avanga an boralin Nominee te'n hamthatna cheng Nuai 2 thleng an dawn theihna a ni. Atal Pension Yojana hnuaiah Kum 18-40 tan inregister theih niin tunah hian 955 in-register tawh an awm mek bawk. Heng Social Security Schemes te hi Account neih dan atanga chhutin kan la ngaipawimawh tawk lo niin a lang a. Bank Account nei zawng zawngte in-register nachang hria a, ngaipawimawh theuh turin meeting chuan mipuite a ngen bawk.

Meeting-ah hian Credit Deposit Ratio (CD Ratio) tarlan niin March Quarter chhunga CD Ratio chu 72.43% a ni a. Bank Loan hrang hrang pekchhuah dan thlirho nghal a ni bawk.

Meeting-ah hian Mamit District Bawrhsap hian Annual Credit Plan (ACP) 2023 - 2024 of Mamit District, Vaibelchhe 102.28 a tlangzarh nghal a ni.

Vawiin thutkhawmah hian Pi Lalengmawii, Lead District Manager, RBI Representative bakah DCC Committee Members te an tel tha hle a ni.