830/2023-2024

Ni 3 awh tur National Legislators Conference(NLC) chu vawiin khan Jio World Convention Centre, Mumbai ah chhunzawm niin chawhma hun ah Lok Sabha Speaker Pu Om Birla leh Maharashtra Dy Chief Minister Pu Devendra Fadnavis ten an telpui a. Lok Sabha Speaker lo ni tawh leh NLC Patron ni mek, Pu Shivraj Patil, Dr.Manohar Joshi, Dr.Meira Kumar leh Pi Sumitra Mahajan te bakah State hrang hrang atangin Speaker 30, Ministers 18, Legislators 1470 chawhma hunah hian an tel a. Mizoram atangin Assembly Speaker Pu Lalrinliana Sailo leh MLA 6 an tel a ni.

NLC ni 2-na chawhnu hunah hian thupui hrang hrang hmangin hmun 40 ah a rualin parallel session neih a ni a. Heng session ah te hian legislator ten an awmna state kalphung țha leh chhuanawm an neihte tarlangin thu an sawi a. Mithiam rualte nen ram dang tih dan țha entawn tlak leh legislator te tana ngaihtuah zui tur pawimawhte sawiho leh zirho a ni. Mizoram Assembly Speaker Pu Lalrinliana Sailo chu Commendable Legislative Practices tih thupui zirhona sessionah Special Guest niin Mizoramin kalphung țha a neih te tarlangin thu a sawi a. Ram dang atanga raltlante lainatna nena a lo dawnsawn dan te, mipui rorelna democracy a taka grassroot level atanga a kalpui dan te , remna leh muanna boruak vawnhim a nih dan te, Assembly chhunga roreltute awmdan mawi leh House zahawmna vawnhim kawngah te, India ramah Assembly rorelna pumpui live telecast hmasa tu state a nih thu te a sawi lang a ni. Mizoram Assembly rorelna live telecast a tih chhuah thin chu state dang MLA te pawhin entawn tlak an tih thu sawihona ah an tarlang a ni.

Vawiin NLC ni 2 na thlenga legislators in register zawng zawng hi 2200 an tling a. National Legislators' Conference atang hian roreltu MLA/MLC ten ram rorelna țha atan political training an mamawh zia hria in state 6 - UP, Karnataka, Sikkim, Rajasthan, Himachal Pradesh, Maharashtra Speaker te chuan an State Assembly ah MLA/MLC te tan political training institute hran din turin hma lak nghalan intiam nghal a ni.