2096/2023-2024

Lawngtlai dated 2nd October 2023: Tukin khan Lawngtlai district Deputy Commissioner pisa tualzawlah Cleanliness Week 2023 hawnna hun hman niin Pu C.Rongura, Executive Member i/c LAD chu khuallian a ni a. Pi Margaret J Vanlalremmawii, SDO(S) chuan hun kaihruaiin NSS, Government Region Higher Secondary School zirlaite he hun ah hian an tel a ni.

Khuallian Pu C.Rongura, Executive Member i/c LAD chuan fai chu mahni ṭheuh atanga inṭan tur a nih thu leh fai duhna chu kan nunphung a bet tlat tur a nih thu a sawi a. Fai leh thianghlimna ngaina mi ni tur chuan ruihtheih thil, zuk leh hmuam lak ah taksa vawn thianghlim a pawimawh thu a sawi. Lawngtlai khawpui chu district hmunpui a nih angin faina kawng ah khaw dangte entawntlak ni turin bawlhhlawh thliar leh vawi khat hman plastic hman kawngah fimkhur a ṭul thu sawiin district fai leh thianghlim a siam tur chuan a chhung a cheng mi tin an pawimawh thu a sawi.

Lawngtlaia Cleanliness Week 2023 hawnna ah hian fai tur a thutiam lakna hun hman niin Pu Elvis Lalthanzuala, Chairman, Joint VC-in a kaihruai a. Pu HC Vanlalruatpuia, Sr. Sanitation Officer, LADC in lawmthu sawina hun a hmang bawk a ni. Vawiin hian Lawngtlai khawchhung veng hrang hrangah Village Council kaihhruaina in faina hnatlang kalpui a ni ang.