2097/2023-2024

Dated Siaha 2nd October 2023 : Tukin zing dar 7 khan Swach Bharat Mission (U) UD&PA Department, Siaha hmalakna in 'Mizoram Cleanliness Week' hawnna leh 'Swachhata hi Seva' kharna inkhawm chu DC Office Complex, Siaha-ah neih a ni a, Pu Lalhmunsanga Hnamte District Bawrhsap chu khuallian niin, Pi B. Malsawmtluangi, District Project Officer (DPO) chuan inkhawm hi a kaihruai.

Pu Lalhmunsanga Hnamte chuan karhnih chhung awh 'Swachhata hi Seva' hlawhtling taka hman anih theihna tura thawktu zawng zawngte inpekna fakawm a tih thu tarlangin 'Mizoram Cleanliness Week" chu lawm takin a hawng tih a sawi a. Siaha mipuiten Cleanliness Week chu hlawk taka hmang turin duhsakna a hlan tih a sawi. Mizoram Cleanliness Week-chu kum tamtak lo hman tawh thin a nih avangin ngaia neih theih tak a ni tih sawiin, inthlahdah mai lova faina lama hmasawn zel turin kum tin a thar a tanlak a tul takzet a ni, a ti.

District Bawrhsap chuan phailam te nena khaikhin chuan Mizoram chu tlangram a nih angin vanneihna tamtak a nei a, bawlhhlawh tamzawk chu ruahtuiin Lui lamah a lenthla mai thin a, khawlai chu fai takin a lang thin a, chutih rualin Mizoram Lui te chu a bawlhhlawh hle a ni, a ti. Kan khawpui te fai takin lang mahse kan Lui neih ang angte chu a thianghlim tawk lo hle a, Mizoram Lui te chu uluk taka vawnfai a tul hle a ni tiin Lui te a lo fai leh thianghlim zawk theih nan bawlhhlawh paih kawngah fimkhur thar a tul hle a, a paihna tur dik takah chauh bawlhhlawh paih thin turin Siaha mipuite a chah.

Pu Lalhmunsanga Hnamte chuan felfai taka bawlhhlawh thliar a tul tih tarlangin, tawih thei leh tawih theilote chu chhungtin ten lo thliar thin a pawimawh hle a, a bik takin sarang hmang tlem a tul tih a sawi a. Siaha khawpui chhunga bawlhhlawhte felfai taka sawngbawl a nih theihna turin hmalak mek a nih thu a tarlang a, reiloteah Siaha khawpui tan bawlhlawh sawngbawlna hmun tha tak siam a ni dawn a ti. Mizoram chu ODF+ state ( Open Defecation Free plus) anih theihna tura thil tulte sawrkar laipui lamah thehluh tawh a nih thu tarlangin, hetiang dinhmun thleng thei tura theihtawp chhuahtute fakawm a tih thu sawiin a bik takin UD&PA,PHE leh LAD-te an chhuanawm hle a ti bawk.

Pu Lalhmunsanga Hnamte chuan 'Sanitation workers' te chu khawtlang fai leh thianghlim taka siamtute an ni tiin fak an phu hle a, VC leh NGO-te theihnghilh theih an ni lo a, vengchhung faina atana an hnathawh zawng zawngah an fakawmin Siaha khawpui mawitute an ni a, chawimawi an phu hle a, zahna chibai kan buk a ni, a ti. Siaha District chu Mizoram district zinga fai leh thianghlim ber ni turin theihtawp chhuah zel a tul a, Cleanliness Week- chu hmangtangkai a, faina lama district dangte entawn khawpa thawk tur leh District fai ber nihna hauh thei tur a tan la tur leh thawhpuiah Siaha mipuite a sawm nghal a ni.

Pi B. Malsawmtluangi, District Project Officer (DPO) chuan 'Swachhata hi Seva' Siahaa kalpui anih dan tlangpui tarlanna a nei a, Faina thutiam sawihona a kaihruai nghal bawk. Mizoram Cleanliness Week hman zel a nih dan tur sawina a neih hnuin kalkhawmte hnena lawmthu sawina neiin hun a khar.