704/2023-2024

2023 Nikir thla ni 7: Vawiin khan Lawngtlai District Consultative Committee (DCC), District Level Review Committee (DLRC) leh District Level Security Committee (DLSC) chu Lawngtlai Sub-Deputy Commissioner Pu Samuel Lalmalsawma Sailo hovin Lawngtlai Press Club-ah an ṭhu khawm.

He ṭhut khawmah hian Lead Bank Office-a Lead District Manager (Siaha & Lawngtlai) Pu Lawmkima, Reserve Bank of India (RBI) Manager Pu Ashish Rai leh NABARD Lungleia District Development Manager Pi C. Phiamphu te bakah, bank hrang hrang leh line department ai awhte an tel a ni.

He hunah hian kum 2023 January thla aṭanga March thla (4th Quarter, 2022-23) chhunga Lawngtlai District-a bank hrang hrangte hna thawh thlir let niin, hmachhawp an neih leh hma lak zui dan tur te sawi ho a ni a. Bank leh mipui sum vawn himna (security) lam te, pawisa leng vel (currency management & remittance) chungchang te, khua leh tuite hamṭhat nana sawrkar laipui ruahmanna hrang hrang - PMAY (Housing for All), Women Self Help Group, loan chi hrang hrang - Kisan Credit Card (KCC), Prime Minister's Employment Generation Programme (PMEGP), Medium Industries loan, Education loan, etc. leh social security scheme hrang hrang - Pradhan Mantri Jeevan Jyoti Bima Yojana (PMJJBY), Pradhan Mantri Suraksha Bima Yojana (PMSBY), Atal Pension Yojana (APY), etc. lama bank hma lak dan te sawi ho a ni bawk.

He ṭhut khawmah hian pawisa thir (coin) leng vel a tam theih nana LDM leh bank lamin hma an laknaah hmasawnna a awm tih tar lan niin, nasa zawka hma lak chhunzamw zel ni se, tih a ni a.  Pawisa hi lehkha aia thira siam a hautak loh zawk avangin thir her chhuah a tam deuh deuh thu te, pawisa thir chu pawisa leng vel atana ruahman a nih thu te, pawisa thir hman loh chuan dawr thil leh chawhmeh man bulṭhut (base price) a tihsan dan leh pawisa nawi awm loh chhuanlama pawisa nawi aia thil zawrh dang inkir mai emaw, pawisa nawi inkir kim loh emaw a tihhluar dan te, chumiin ṭul lova mipui sum hman ral a tihpun thu te tar lan niin, he’ng harsatna hrang hrang hi sut kian a nih theih nan Lawngtlai District mipuite, dawrkaite leh bank-te chu pawisa thir dawn leh hman kawngah tim lo tur leh hnar lo turin Committee chuan a ngen a ni.

He hunah hian RBI-in ₹ 2,000/- (cheng sanghnih) note tlang a hnuh kir chungchang pawh tar lan niin, ₹ 2,000/- tlang la kawlte tan kum 2023 September ni 30 thlengin bank-ah dah luh leh thleng theih a ni a, hemi hun tiam piah lamah hi chuan ₹ 2,000/- tlang hi tihthih a nih tawh dawn avangin hun tiam chhunga tihfel tum vek turin DCC meeting chuan Lawngtlai District mipuite a ngen a. Hemi chungchangah hian mipuiin harsatna an tahw lohna turin zau zawka puanzar a nih theih nan hma lak ni se, tih a ni.

He hunah hian mipui hamṭhatna tura sawrkar laipui ruahmanna, social security (Jan Suraksha) scheme hrang hrang - PMJJBY, PMSBY leh APY te thingtlang mipuite'n an hriat chian a, an chhawr ngei theihna tura khaw tin tuam chhuaka hma lakna tur, Saturation Campaign atana Lawngtlai District chhunga bank branch hrang hrangte khaw chanpual semna (allotted village) list thlir ho niin, pawm a ni a. He'ng an khaw chanpualah hian June thla chhungin branch tinin campaign hi ngawrh takin kalpui ni se, tih a ni.

Bank hrang hrang dinhmun thlir honaah Credit/Deposit Ratio-a national benchmark 60% a nih laiin, Lawngtlaia bank-te chuan CD Ratio 114.79% lai an nei a. CD ratio a ṭhat viau lai hian mipui harsa zawkte leh kut hna thawktute chhawr theih tur loan ṭhenkhatah ṭan lak a ṭul thu tar lan a ni a. Agriculture kaihhnawih loan pek chhuah a tam zawk theih nan line department leh bank lam te'n ṭan la chho zel se, tih a ni a. Education loan pek leh puanzar lamah pawh ṭan lak ni se, tih a ni bawk.