703/2023-2024

Lunglei the 7th June, 2023 – Mizoram chhim lam tana air connectivity tih hmasawnna tura hmalakna pawimawh tak, thlawhtheihna tumhmun sakna hmun tura thlan (identify) enfiahna ‘Aerial Survey’ chu vawiin khan Vuakmual, Lunglei District-ah neih a ni.

Helicopter-a Aerial Survey neih hi Kawmzawl Helipad, Lunglei atanga thlawk chhuak in, Agriculture Minister Pu C. Lalrinsanga, Rajya Sabha MP Pu K. Vanlalvena, Lunglei HPC Vice Chairman Pu Lawmawma Tochhawng, leh I&PR Department, MJA Lunglei leh party hruaitu an tel a ni.

Mizoram ti hmasawn zel tura inkalpawhnate siam that leh siam belh kawnga hmalakna kal mekah Air Connectivity tih changtlun zel chu Mizoram Sawrkarin a ngai pawimawh takzet a. Mizoram Sawrkar ngenna avangin April ni 14, 2023 chawhnu dar 2:30-ah khan Civil Aviation Ministry-ah Pu Rajiv Bansal, IAS, Secretary, Civil Aviation, leh Dr Renu Sharma, IAS, Chief Secretary, Mizoram te hovin Civil Aviation Ministry, Directorate General of Civil Aviation leh Pawan Hans hotulu te nen Mizoram sawrkar GAD official te chuan meeting pawimawh tak an nei a. He Meeting ah hian Mizoram chhim lama thlawhna tumhmun (Greenfield Airport) a rang thei ang bera siam ve a nih theihna tura hmalak dan tur te chipchiar taka sawiho a ni a. He meeting thutlukna chu, "Mizoram Sawrkarin a tul angin thlawhna tumhmun (Greenfield Airport)sak theihna hmun tur lo identify se la. He hmun identify a nih hnu hian Detailed Survey leh Detailed Project Report-te buatsaih ni se la" tih a ni.

Vawiin Survey neih hi he meeting thutlukna bawhzuina niin survey-ah hian Vuakmual tlangdung hi Helicopter atanga a lan danin thlawhna tumhmun (Greenfield Airport) sak theihna tur a ni em tih te; a chheh velah hian ram rem Terminal Building, Fire Station, etc. sakna turte a awm em tih te; Vuakmual tlangdung chheh velah hiah thlawhtheihna tum tur/thlawk chhhuak tur tana hnawksak thei tur tlang sang hnaivaiah a awm em tih te enfiah a ni a.

Vawiin Survey hi a tum khatna niin Technical Survey te pawh neih leh thuai tur a ni a. Vuakmual pan tur hian Lunglei atangin kawng siam ni dawn ta se la, kawng engtianga sei (in kms) nge siam ngai ang tih te leh mimalin ram an la neih lohna free land a nih leh nih loh te pawh finfiah leh tur a ni a. Vuakmual pan tur hian Chhumkhum, Vanhne atanga De Lui kaltlangin Lunglei khawpui atangin 25-30kms vel a thui tura chhut niin, Chhumliamkawn atang hian kawng hi la siam ngai a ni.

Vuakmual Airport siam tum hi Sawrkar Laipui Ministry of Civil Aviation hnuaia Regional Connectivity Scheme (RCS) – Ude Desh Ka Aam Nagrik (UDAN) 5.0 kaltlanga ruahman anih theihna turin Sawrkar Laipuiah dilna thehluh tawh a ni.